Łatvijskaja siamja prasiła ŭ Biełarusi status uciekačoŭ, raskazvała prapahandzie pra harotnaje žyćcio na Zachadzie. Ale sud rašyŭ, što ŭ Łatvii im «ničoha nie pahražaje»
38-hadovy Karlis Ozałyńš rodam z łatvijskaha siała Rahana. Razam z žonkaj i dziećmi jon pierajechaŭ bolš za hod tamu ŭ Biełaruś i navat kupiŭ dom u vioscy Rosica Vierchniadźvinskaha rajona. U Biełarusi ŭ siamji naradziłasia dačka. Ciapier Karlis chodzić pa biełaruskich sudach sa skarhami, bo siamji admovili ŭ biežanstvie i inšaj abaronie.
«U Łatvii ŭ Karlisa była svaja budaŭničaja firma, ale jon usio pakinuŭ i pryjechaŭ žyć u hłuchuju biełaruskuju pravincyju. Svoj vybar — niezvyčajny dla biełarusaŭ, jakija imknucca pierabracca ŭ harady, — łatyš tłumačyć tym, što ŭ našaj krainie zusim inšaja situacyja. «Jeŭropa, jak u pryncypie i Łatvija, idzie da razbureńnia, jak ja heta baču», — pieradavaŭ słovy łatyša Sputnik.
Siamja, jak śćviardžaŭ Karlis, uciakła z Łatvii praz «situacyju ŭ krainie».
«Viadoma, nichto jaho asabista nie pieraśledvaŭ, «ale idzie cisk na ŭvieś narod», — pisaŭ prakramloŭski Sputnik.
Pavodle słoŭ Ozałyńša vydańniu, «u bałtyjskaj respublicy viadziecca prapahanda suprać ruskich, i jon vyrašyŭ nie čakać momantu, kali jaho žonka sutykniecca z prablemami praz toje, što jana ruskaja».
«Kolki vypadkaŭ było, kali źbivali žančyn i dziaciej tolki za toje, što jany razmaŭlajuć pa-rusku. Heta, viadoma, nieprymalna», — malavaŭ jon karciny prapahandystam.
Asabliva ž prykmietna ŭ tekście, što mužčyna vystupaje suprać vakcyn i źjaŭlajecca kavid-dysidentam. Praz admovu ad vakcynacyi jon mieŭ u Łatvii prablemy z pracaj i biznesam.
Ale ŭ Biełarusi siamji admovili ŭ abaronie. Jak zaŭvažyŭ telehram-kanał «Vitiebsk, ja hulaju!», biełaruski sud pryznaŭ, što ŭ Łatvii siamji ničoha nie pahražaje i aścierahacca pieraśledu pry viartańni ŭ krainu, hramadzianami jakoj jany zjaŭlajucca, niama čaho.
«Pavodle najaŭnaj infarmacyi, u 2021 hodzie Ł. [Łatvija] zastavałasia krainaj sa stabilnaj demakratyjaj, z dobra raźvitaj vybarčaj sistemaj, jakaja karystajecca davieram, aktyŭnaj hramadzianskaj supolnaściu, niezaležnymi miedyja i strukturami miascovaha samakiravańnia, što dobra funkcyjanujuć. Kanfliktu mižnarodnaha abo niemižnarodnaha charaktaru ŭ Ł. niama.
Takim čynam, u siamji adsutničajuć abhruntavanyja aściarohi sutyknucca pry viartańni ŭ Ł. z pahrozaj śmiarotnaha pakarańnia, katavańniaŭ i inšych žorstkich, biesčałaviečnych abo prynižalnych hodnaść sposabaŭ abychodžańnia i pakarańnia, a taksama z pahrozaj žyćciu», — havorycca ŭ rašeńni suda Centralnaha rajona Minska.
Ciapier čytajuć
«Ja chaču spraviadlivaści — i dla žančyn, i dla siabie». Ščyraja hutarka z Andrejem Stryžakom pra skandał z dykpikami, zaležnaści i budučyniu37
Kamientary
Karystny idyjot.