Na sudzie nad Jurhilevič i Mažejkam pačynajucca sudovyja sprečki. Staviać u vinu infarmacyju pra sud nad Alesiem Puškinym
Julija i Pavieł abvinavačvajucca pa č. 2 art. 361-4 Kryminalnaha kodeksa «za inšaje sadziejničańnie ekstremisckaj dziejnaści, ździejśnienaje paŭtorna hrupaj asob pa papiaredniaj zmovie».
U Hrodnie na sudovym pracesie pa spravie Julii Jurhilevič i Paŭła Mažejki pačalisia sprečki bakoŭ, jak piša BiełTA.
Pavodle materyjałaŭ spravy, Pavieł Mažejka, dziejničajučy hrupaj asob pa papiaredniaj zmovie ź Julijaj Jurhilevič, ź lutaha pa sakavik 2022 hoda pieradaŭ «nieŭstanoŭlenym asobam» dla raźmiaščeńnia na internet-partałach «Biełsata» atrymanuju ad Julii Jurhilevič infarmacyju ab pazbaŭleńni jaje licenzii advakata i vyklučeńni z Hrodzienskaj abłasnoj kalehii advakataŭ i ab razhladzie Minskim haradskim sudom kryminalnaj spravy ŭ dačynieńni da Alesia Puškina i pryznačeńni jamu pakarańnia.
Śćviardžajecca, što paśla hetaha źviestki byli apublikavanyja ŭ adkrytym dostupie ŭ internecie na sajcie «Biełsata», «zabiaśpiečyŭšy takim čynam dostup da nazvanaj infarmacyi nieabmiežavanamu kołu asob».
Śledstva śćviardžaje, što tym samym Julija Jurhilevič i Pavieł Mažejka hrupaj asob pa papiaredniaj zmovie «akazali inšaje sadziejničańnie ekstremisckaj dziejnaści, jakoje zahadzia nakiravana na płanavańnie, arhanizacyju, padrychtoŭku i ździajśnieńnie zamachaŭ na asnovy kanstytucyjnaha ładu i hramadskuju biaśpieku Respubliki Biełaruś, dyskredytacyju orhanaŭ dziaržaŭnaj ułady i kiravańnia, abiascenili kaštoŭnaści i mety hramadstva i dziaržavy, orhanaŭ dziaržaŭnaj ułady i kiravańnia, pravaachoŭnaj sistemy i sudoŭ pa zabieśpiačeńni pravoŭ, svabod i harantyj šlacham raspaŭsiudžvańnia ŭ hetych metach zahadzia łžyvych źviestak».
Sudovy praces idzie ŭ Hrodzienskim abłasnym sudzie. Pasiadžeńnie prachodzić u adkrytym režymie.
***
Pavieł i Julija admaŭlajuć vinu.
Jurhilevič zajaviła, što jaje trymajuć u «śvinskich umovach» i nie dali aznajomicca sa spravaj.
Da suda fihuranty admovilisia davać pakazańni, u sudzie Mažejka adkazvaje na pytańni vybaračna. Baćka žurnalista Ivan Mažejka admoviŭsia śviedčyć suprać syna.
Nakolki viedaje žonka Mažejki Iryna Čarniaŭka, Paŭła i Juliju pryvodziać na praces u kajdankach, ale zdymajuć ich na čas pasiadžeńnia.
Juliju pryviali ŭ sud u robie z nadpisam «Karcar №2».
Spravu razhladaje rekardsmien pa palityčnych prysudach sudździa Maksim Fiłataŭ, jaki daŭ Vitoldu Ašurku piać hadoŭ kałonii.
U dakumientach pa «spravie Epštejna» znajšli ślady bujnych hrašovych pieravodaŭ u Minsk. Znoŭ uspłyło imia Karyny Šulak44
Kamientary