На судзе над Юргілевіч і Мажэйкам пачынаюцца судовыя спрэчкі. Ставяць у віну інфармацыю пра суд над Алесем Пушкіным
Юлія і Павел абвінавачваюцца па ч. 2 арт. 361-4 Крымінальнага кодэкса «за іншае садзейнічанне экстрэмісцкай дзейнасці, здзейсненае паўторна групай асоб па папярэдняй змове».
У Гродне на судовым працэсе па справе Юліі Юргілевіч і Паўла Мажэйкі пачаліся спрэчкі бакоў, як піша БелТА.
Паводле матэрыялаў справы, Павел Мажэйка, дзейнічаючы групай асоб па папярэдняй змове з Юліяй Юргілевіч, з лютага па сакавік 2022 года перадаў «неўстаноўленым асобам» для размяшчэння на інтэрнэт-парталах «Белсата» атрыманую ад Юліі Юргілевіч інфармацыю аб пазбаўленні яе ліцэнзіі адваката і выключэнні з Гродзенскай абласной калегіі адвакатаў і аб разглядзе Мінскім гарадскім судом крымінальнай справы ў дачыненні да Алеся Пушкіна і прызначэнні яму пакарання.
Сцвярджаецца, што пасля гэтага звесткі былі апублікаваныя ў адкрытым доступе ў інтэрнэце на сайце «Белсата», «забяспечыўшы такім чынам доступ да названай інфармацыі неабмежаванаму колу асоб».
Следства сцвярджае, што тым самым Юлія Юргілевіч і Павел Мажэйка групай асоб па папярэдняй змове «аказалі іншае садзейнічанне экстрэмісцкай дзейнасці, якое загадзя накіравана на планаванне, арганізацыю, падрыхтоўку і здзяйсненне замахаў на асновы канстытуцыйнага ладу і грамадскую бяспеку Рэспублікі Беларусь, дыскрэдытацыю органаў дзяржаўнай улады і кіравання, абясцэнілі каштоўнасці і мэты грамадства і дзяржавы, органаў дзяржаўнай улады і кіравання, праваахоўнай сістэмы і судоў па забеспячэнні правоў, свабод і гарантый шляхам распаўсюджвання ў гэтых мэтах загадзя лжывых звестак».
Судовы працэс ідзе ў Гродзенскім абласным судзе. Пасяджэнне праходзіць у адкрытым рэжыме.
***
Павел і Юлія адмаўляюць віну.
Юргілевіч заявіла, што яе трымаюць у «свінскіх умовах» і не далі азнаёміцца са справай.
Да суда фігуранты адмовіліся даваць паказанні, у судзе Мажэйка адказвае на пытанні выбарачна. Бацька журналіста Іван Мажэйка адмовіўся сведчыць супраць сына.
Наколькі ведае жонка Мажэйкі Ірына Чарняўка, Паўла і Юлію прыводзяць на працэс у кайданках, але здымаюць іх на час пасяджэння.
Юлію прывялі ў суд у робе з надпісам «Карцар №2».
Справу разглядае рэкардсмен па палітычных прысудах суддзя Максім Філатаў, які даў Вітольду Ашурку пяць гадоў калоніі.
Цяпер чытаюць
Зніклы Анатоль Котаў быў партнёрам самага высокапастаўленага беларускага разведчыка, які пераехаў у Польшчу. Тут можа быць ключ да разгадкі яго знікнення7777
Каментары