Другі дзень суда над Мажэйкам і Юргілевіч. Юлія заявіла, што яе трымаюць у «скоцкіх умовах»
З 10 ліпеня ў Гродзенскім абласным судзе ідзе працэс над журналістам Паўлам Мажэйкам і адвакаткай Юліяй Юргілевіч. Пасяджэнне праходзіць у адкрытым рэжыме.
Як піша «Свабода», следства сцвярджае, што Юлія Юргілевіч расказала ў тэлефоннай размове Паўлу пра сваё звальненне з адвакатуры і пра прысуд Алесю Пушкіну. Пракурор спрабуе даказаць, што якраз Павел размясціў гэтую інфармацыю на старонцы «Белсату». Спосаб, час і асобы перадачы інфармацыі пры гэтым не вызначаныя.
Павел і Юлія адмаўляюць віну.
Юргілевіч заявіла, што яе трымаюць у «скоцкіх умовах» і ёй не далі азнаёміцца са справай.
Да суда фігуранты адмовіліся даваць паказанні, у судзе Мажэйка адказвае на пытанні выбарачна. Бацька журналіста Іван Мажэйка адмовіўся сведчыць супраць свайго сына.
Наколькі ведае жонка Мажэйкі Ірына Чарняўка, Паўла і Юлію прыводзяць на працэс у кайданках, але здымаюць іх на час пасяджэння.
На другі дзень, як піша «Свабода», Павел і Юлія выглядалі больш змучанымі.
10 ліпеня ў Гродне пачалі судзіць адвакатку Юлію Юргілевіч і журналіста Паўла Мажэйку. Юлію прывялі ў суд у робе з надпісам «Карцар №2».
Іх вінавацяць паводле ч. 2 арт. 361-4 КК за «іншае садзейнічанне экстрэмісцкай дзейнасці, учыненае паўторна, групай асоб па папярэдняй змове».
Справу разглядае рэкардсмен па палітычных прысудах суддзя Максім Філатаў, які даў Вітольду Ашурку пяць гадоў калоніі.
Цяпер чытаюць
Феномен медыцынскага ўніверсітэта: кабала з размеркаваннем, невялікія заробкі, але ад абітурыентаў адбою няма7
Каментары