21-hadovy hałkipier minskaha «Dynama» Alaksiej Kołasaŭ padpisaŭ trochhadovy kantrakt z «Fiładelfijaj Fłajerz» z Nacyjanalnaj chakiejnaj lihi, jak paviedamlaje BYsport.
Pavodle pahadnieńnia z «lotčykami», bazavy akład Alaksieja składzie 832,5 tysiačy dalaraŭ. Jašče 92,5 tysiačy praduhledžany ŭ jakaści bonusaŭ. U vypadku vysyłki ŭ farm-kłub hadavy zarobak pamienšycca šmatkroć da 80 tysiač.
Ci budzie hulać Kołasaŭ u «Fiładelfii», pytańnie. Jon nie raz zajaŭlaŭ, što choča praciahnuć karjeru ŭ «Dynama». Ahient chakieista Aloša Piłko paviedamiŭ, što jahony klijent «pačnie i skončyć siezon u składzie minskaha «Dynama».
Taksama ŭ kłubie zajaŭlajuć, što «Fiładelfii» pakul nie patrebny pryjezd Kołasava. Jon moža praciahvać raźvivać svaju hulniu ŭ KCHŁ, a «Fłajierz» mohuć prosta pazyčyć jaho nazad u jaho kamandu, i jon tady sapraŭdy debiutuje na prafiesijnym uzroŭni ŭ nastupnym siezonie.
Aproč taho, rasijanin Ivan Fiadotaŭ, jaki prapuściŭ siezon-2022/23 praz słužbu ŭ vojsku, učora padpisaŭ kantrakt na dva hady z CSKA i nie źbirajecca hulać za «lotčykaŭ».
Ale kali Alaksiej Kołasaŭ zahulaje za «Fiładelfiju», jon stanie 15-m biełaruskim chakieistam u hałoŭnaj chakiejnaj lizie śvietu z 1992 hoda. U minułym siezonie ŭ NCHŁ hulali Jahor Šaranhovič («Ńju-Džersi»), Alaksiej Protas («Vašynhton») i dva matčy za «Aryzonu» pravioŭ Uładzisłaŭ Kalačonak.
Niaklajeŭ apublikavaŭ złabadzionny vierš. U im zhadvajecca i Kaleśnikava z Babarykam, i Cichanoŭskaja, i Prakopjeŭ z Paźniakom23
Kamientary