Voś čamu prapanova krain Afryki daje vialikuju nadzieju Biełarusi
Heta sihnał, što dypłamatyčnaje rašeńnie kanfliktu ź vialikaj imaviernaściu budzie ŭklučać biełaruskaje pytańnie, piša Vasil Harbaciuk.
Ahienctva Reuters atrymała dostup da niepubličnaha śpisa papiarednich umoŭ, jaki delehacyja afrykanskich krain źbirajecca prapanavać prezidentam Ukrainy i Rasii «dla ŭmacavańnia davieru pamiž imi». U jakaści pieršaha kroku tam praduhledžvajecca vyvad rasijskaj taktyčnaj jadziernaj zbroi ź Biełarusi. Siońnia ź vizitu ŭ Kijeŭ pačałasia miratvorčaja misija afrykanskich prezidentaŭ.
Pakiniem za dužkami pytańnie, ci taja zbroja ŭ Biełarusi realna staić ci budzie stajać — lahčej za ŭsio ŭvieźci makiety i ich ža vyvieźci ŭ jakaści žestu dobraj voli. Havorka pra inšaje.
Navat kali b Biełarusi ŭsiaho tolki ŭdałosia pazbycca jadziernaj zbroi, heta ŭžo vializnaja palohka, bo vyvodzić našu krainu z zony patencyjnaha ŭdaru ŭ adkaz. Kali ž Biełarusi ŭdasca vyzvalicca i z-pad rasijskaha kantrolu — heta ŭvohule byŭ by histaryčny pierałom. Ci zdarycca heta pa vynikach vajny, jakaja pieratvarajecca ŭ katastrofu dla Kramla?
Paśla taho, jak ź Biełarusi na Ukrainu napali, Kijeŭ nie budzie adčuvać siabie ŭ biaśpiecy, pakul taki scenar moža paŭtarycca. Pierachod Biełarusi z-pad rasijskaha kantrolu ŭ niejtralny status — nadzionnaja patreba Kijeva, Varšavy ź Vilniaj taksama. Prapanovy kiraŭnikoŭ Afryki pakazvajuć, što heta razumiejuć nie tolki ŭ našym rehijonie, ale i va ŭsim śviecie.
Kali b vajna skončyłasia novaj žaleznaj zasłonaj, a Biełaruś zastałasia pa toj bok jaje, było b kiepska nam jašče niekalki dziesiacihodździaŭ napierad.
A voś toje, što Biełaruś apynajecca na stale pieramoŭ ab skančeńni vajny va Ukrainie, — dobry znak. Heta sihnał, što pieramoha Ukrainy i dypłamatyčnaje rašeńnie kanfliktu pa jaje vynikach ź vialikaj imaviernaściu budzie ŭklučać biełaruskaje pytańnie. Štości biełarusy ad taho vyjhrajuć — nie vialikaje, to choć ziernietka małoje.
Čytajcie taksama: Śvińnia i parasia. Voś čamu pry lubych pieramovach Zachadu z Maskvoj pytańnie nielehitymnaści minskaha kiraŭnictva budzie pastaŭlena rubam
«Naša Niva» — bastyjon biełaruščyny
PADTRYMAĆ
Kamientary