Na Zachadzie paćviardžajuć pośpiechi kontrnastupleńnia Ukrainy i prahnazujuć dalejšy prahres
Zachodnija dziaržavy aceńvajuć, što z pačatku kontrnastupalnych dziejańniaŭ ukrainskija siły zmahli prasunucca na kala siami kiłamietraŭ uhłyb akupavanych Rasijaj terytoryj i vyzvalić pa mienšaj miery čatyry siały. Pra heta, jak piša «Jeŭrapiejskaja praŭda» sa spasyłkaj na Sky News, u sieradu žurnalistam zajavili na ŭmovach ananimnaści zachodnija čynoŭniki, adkaznyja za abaronu.
Adznačajučy pośpiechi Uzbrojenych sił Ukrainy, surazmoŭcy žurnalistaŭ, adnak, adznačyli, što rasijski bok u cełym dobra padrychtavaŭsia da nastupalnych dziejańniaŭ, jakraz tamu prasoŭvańnie ciapier idzie pavolna.
«Rasijskija vojski ŭ cełym dobra trymajuć abaronu sa svaich dobra padrychtavanych pazicyj i adstupajuć pamiž taktyčnymi linijami. Taki manieŭrany padychod da abarony stvaraje składanaści dla ŭkraincaŭ, a taksama doraha kaštuje nadychodziačym siłam», — rastłumačyli jany.
Pieršyja kontrnastupalnyja dziejańni, pavodle acenki zachodnich čynoŭnikaŭ, źjaŭlajucca bolš čym «zandujučaj apieracyjaj». «Heta poŭnamaštabnaje pieramiaščeńnie braniatechniki i ciažkaha ŭzbrajeńnia ŭ rasijskuju zonu biaśpieki i prasoŭvańnie napierad. Prasoŭvańnie idzie pavolna praź minnyja pali i pieraškody, ź jakimi jany sutykajucca, ale heta toje, čaho my i čakali. Jany buduć praciahvać ruchacca napierad», — skazali jany.
Surazmoŭcy žurnalistaŭ papiaredzili, što havorka idzie pra pieršyja dni kontrnastupleńnia, i prahnazavać nastupstvy składana. Tym nie mienš, «Ukraina zachoŭvaje addanyja, dobra ekipiravanyja siły, ale kanflikt, chutčej za ŭsio, budzie charaktaryzavacca ciažkimi i zatratnymi bajavymi dziejańniami na praciahu mnohich miesiacaŭ».
Padobnym čynam akreśliła aktualnuju situacyju i namieśnica ministra abarony Ukrainy Hanna Malar padčas siońniašniaha vystupleńnia ŭ efiry nacyjanalnaha telemarafonu:
«U nas na niekalkich kirunkach idzie nastup, ale hetak ža na niekalkich kirunkach idzie i nastup voraha. Heta značyć, što pa stanie na ciapier my znachodzimsia i ŭ nastupleńni, i ŭ abaronie. Prosta na roznych napramkach. Idzie vielmi surjoznaje supraćstajańnie.
Pa-druhoje, vorah pavialičvaje ciapier kolkaść abstrełaŭ — i artyleryjskich, i minamiotnych, avijacyjnych udaraŭ bolš nanosić i takim čynam sprabuje spyniać naš nastup.
Akramia taho, naprykład, na poŭdni našy vojski sutykajucca z sucelnym miniravańniem paloŭ. Tamu vielmi składana prasoŭvacca. Tak, heta mahčyma, pavolna, kali hladzieć na ličby, ale heta prasoŭvańnie dakładna».
Čytajcie taksama:
Ukrainskija vajskoŭcy pakazali kadry z vyzvalenaj Makaraŭki ŭ Danieckaj vobłaści
Ukraincy rakietnym udaram źniščyli načalnika štaba 35-j armii
Ciapier čytajuć
Dron prylacieŭ u pasažyrski aŭtobus na miažy Rasii i Biełarusi10
Kamientary