Pazašlubny syn Šajhu źjechaŭ z Rasii za niekalki dzion da mabilizacyi — rasśledavańnie
Kamanda Alaksieja Navalnaha vypuściła rasśledavańnie ab pazašlubnym synie ministra abarony Rasii Siarhieja Šajhu, u jakim havorycca, što 22-hadovy Daniła Šabunoŭ atrymlivaje «pad miljon rubloŭ» (12 500 dalaraŭ) ad zdačy dvuch ofisnych pamiaškańniaŭ u centry Maskvy. Za jaki pramiežak času — u rasśledavańni nie paviedamlajecca.
Paplečniki Navalnaha taksama śćviardžajuć, što za niekalki dzion da abviaščeńnia Uładzimiram Pucinym tak zvanaj častkovaj mabilizacyi Šabunoŭ źjechaŭ z Rasii ŭ Turcyju, piša «Radyjo Svaboda».
U hety momant pazašlubny syn Šajhu nibyta zaniaty ŭłasnaj muzyčnaj karjeraj. Jak śpiavak jon zapisvaje pieśni na anhlijskaj movie i zdymaje klipy pad psieŭdanimam Sheba. Pry hetym, pa danych kamandy Navalnaha, na videa z Šabunovym «nakručanyja dziasiatki tysiač prahladaŭ», u toj čas jak u jaho jutub-kanała krychu bolš za 700 padpisčykaŭ, a ŭ jaho klipaŭ — bolš za 250 tysiač prahladaŭ.
Pavodle źviestak šerahu ŚMI, Daniła Šabunoŭ — syn Siarhieja Šajhu i byłoj ściuardesy lotnaha atrada MNS Aleny Šabunovaj. U 2019 hodzie The Insider vypuściŭ rasśledavańnie, u jakim paviedamlałasia, što Šabunova zarabiła miljardy rubloŭ na kantraktach z MNS i Minabarony. Taksama śćviardžałasia, što ŭ jaje ad Šajhu troje dziaciej. Usie jany chadzili ŭ elitnuju škołu «Prezident» na Rubloŭcy, navučańnie ŭ jakoj kaštuje kala dvuch miljonaŭ rubloŭ na hod.
Infarmacyju pra toje, što ŭ ministra abarony Rasii jość pazašlubnyja dzieci, ni rasijskija ŭłady, ni sam Siarhiej Šajhu nie kamientavali. Aficyjna kiraŭnik abaronnaha viedamstva žanaty ź Irynaj Šajhu, i ŭ ich dźvie dački: Julija, dyrektar Centra ekstrannaj psichałahičnaj dapamohi MNS, i Ksienija, jakaja kiruje Fiederacyjaj tryjatłona Rasii.
Niekalki hadoŭ tamu Alena Šabunova vyjšła zamuž za hramadzianina Litvy Adołfa Kaminskasa i ŭziała jaho proźvišča. U 2022 hodzie litoŭskija ŭłady pazbavili jaje dazvołu na žycharstva, tak jak jaje znachodžańnie ŭ krainie «moža pahražać nacyjanalnaj biaśpiecy».
Ciapier čytajuć
Na mitynhu ŭ Vilni zatrymali pravakatara. A Cichanoŭski zajaviŭ pra namier dabivacca sustrečy ź Zialenskim11
Kamientary