Prysud Ramanu Pratasieviču ŭstupiŭ u siłu. Apielacyi nie było

«Prysud ustupiŭ u zakonnuju siłu, bo nie byŭ abskardžany ci apratestavany», — adznačyli ŭ sudzie.

Na pytańnie vydańnia, ci ŭziaty Pratasievič pad vartu, pradstaŭnica suda adkazała: «Heta ŭ paradku vykanańnia».

3 maja Raman Pratasievič byŭ asudžany na 8 hadoŭ kałonii ŭzmocnienaha režymu pa spravie Nexta. Ale jaho pakinuli pad chatnim aryštam da momantu ŭstupleńnia prysudu ŭ siłu.

«Paśla ŭstupleńnia prysudu ŭ zakonnuju siłu ŭ častcy vykanańnia prysudu jon budzie ŭziaty pad vartu i adpraŭleny adbyvać pakarańnie ŭ papraŭčaj kałonii ŭzmocnienaha režymu», patłumačyła žurnalistam prakurorka.

Sud pa spravie Nexta pačaŭsia 16 lutaha. Razam z Pratasievičam sudzili Ściapana Puciłu i Jana Rudzika. Pakolki jany znachodziacca za miažoj, ich sudzili zavočna, adpaviedna, pryhavor byŭ nastupny: 20 i 19 hadoŭ adpaviedna.

Aŭtaram Nexta stavicca ŭ vinu nie mienš za 1586 złačynstvaŭ pavodle dziasiatka artykułaŭ Kryminalnaha kodeksa, u tym liku:

— raspalvańnie sacyjalnaj varožaści (č. 3 art. 130 KK Biełarusi);

— arhanizacyja masavych biesparadkaŭ, navučańnie i inšaja padrychtoŭka asob dla ŭdziełu ŭ ich (č. 1 i č. 3 art. 293 KK Biełarusi);

— arhanizacyja hrupavych dziejańniaŭ, jakija hruba parušajuć hramadski paradak, spałučanych ź vidavočnym niepadparadkavańniem zakonnym patrabavańniam pradstaŭnikoŭ ułady, navučańnie i inšaja padrychtoŭka asob dla ŭdziełu ŭ ich (č. 1 i č. 2 art. 342 KK Biełarusi);

— publičnyja zakliki da zachopu dziaržaŭnaj ułady, akta teraryzmu, inšych dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś (č. 3 art. 361 KK Biełarusi);

— stvareńnie ekstremisckaha farmavańnia i kiravańnie im (č. 1 art. 361-1 KK Biełarusi);

— paklop i publičnaja abraza Łukašenki (č. 2 art. 367, č. 2 st. 368 KK Biełaruś).

Akramia taho, Puciłu i Rudzika ŭ roznym spałučeńni abvinavacili ŭ ździajśnieńni nastupnych złačynstvaŭ:

— zmova z metaj zachopu dziaržaŭnaj ułady niekanstytucyjnym šlacham (č. 1 art. 357 KK Biełarusi);

— finansavańnie ekstremisckaj dziejnaści (č. 2 art. 361-2 KK Biełarusi);

— dyskredytacyja Respubliki Biełaruś (art. 369-1 KK Biełarusi).

Hienprakuraturaj u intaresach dziaržavy zajaŭleny isk na bolš čym 30 miljonaŭ rubloŭ. Jaho buduć razhladać asobna. 

Raman Pratasievič pryznaŭ vinu. U apošnim słovie kajaŭsia i prasiŭ nie pazbaŭlać jaho voli, zajaŭlaŭ, što paplečniki jaho vykarystali i zdali biełaruskim uładam. Taksama jon asprečvaŭ pamier škody i toje, što byŭ kiraŭnikom ekstremisckich arhanizacyj. 

Pratasievič byŭ zatrymany razam z Safijaj Sapiehaj 23 maja ŭ vyniku prymusovaj pasadki ŭ Minsku samalota Ryanair rejsam Afiny — Vilnia. Niejki čas znachodziŭsia ŭ SIZA, a zatym pad chatnim aryštam.

6 maja 2022 hoda Sapiehu asudzili da šaści hadoŭ kałonii. Sud pryznaŭ jaje vinavataj u raspalvańni sacyjalnaj varožaści, źlivie danych siłavikoŭ (sprava «Čornaj knihi Biełarusi»).

24 maja Preśnienski sud Maskvy razhledzić spravu Fiederalnaj słužby vykanańnia pakarańniaŭ ab pieradačy Rasii asudžanaj u Biełarusi dziaŭčyny.

• 7
• 0
• 7
• 3
• 1
• 2
• 6
• 0