Intelekt vašaha načalnika moža być štučnym

Nadyšoŭ čas, kali niaprosta zdahadacca, daścipnyja zaŭvahi i źmiastoŭnyja punkty ŭ prezientacyjach napraŭdu prydumaŭ vaš načalnik ci ich stvaryŭ štučny intelekt.

Žurnalist Kałum Borčers u artykule dla WSJ apisvaje, jak paprasiŭ čat GPT napisać elektronny list supracoŭnikam ad hienieralnaha dyrektara z nahody Dnia pamiaci (śviata ŭ Złučanych Štatach, jakoje ŭšanoŭvaje pamiać zahinułych amierykanskich vajskoŭcaŭ i adznačajecca ŭ apošni paniadziełak maja).

U vyniku vinšavańnie mieła adpaviedny ton, poŭny hłybokaj pašany, i zaklikała supracoŭnikaŭ atrymać asałodu ad doŭhich vychadnych i parazvažać pra «śmiełych mužčyn i žančyn, jakija prynieśli najvyšejšuju achviaru». Choć list byŭ napoŭnieny štampami i niešta ŭ im paŭtarałasia — jon całkam vyhladaŭ jak list, napisany čałaviekam z vysokaha kiraŭnictva. 

Z adzinym niedachopam: u liście była paznačanaja letašniaja data śviata, bo ŠI biare danyja, jakija ŭžo jość u dostupie.

Jak ŠI moža prydacca kiraŭnictvu

Bolšaść kiraŭnikoŭ najvyšejšaha źviana čakajuć, što štučny intelekt istotna paŭpłyvaje na ich arhanizacyi ŭ nastupnyja try-piać hadoŭ. Jon moža napisać vodhuk ab pradukcyjnaści padnačalenaha, dapamoža ŭ składańni słužbovych instrukcyj, prezientacyj, listoŭ da supracoŭnikaŭ. 

Mnohija kiraŭniki ŭžo źviartajucca da takich instrumientaŭ, jak Bard i ChatGPT, kab spraścić kamunikacyju, — i choć mašyna nie robić usio daskanała, jana biare na siabie istotnuju častku pracy.

Mieniedžary nie prosta čakajuć źmien: jany raźbirajucca z tym, jak ukaranić novyja technałohii, užo ciapier, i na hetym tydni amierykanskaja karparacyja IBM zajaviła, što prypynić nabor supracoŭnikaŭ na pasady bek-ofisa, jakija nieŭzabavie mohuć być aŭtamatyzavanyja.

Mahčymaści i pieravahi

Ciažka ŭjavić, jak možna delehavać botu składańnie čahości važnaha — takoha, jak tekst dla nobieleŭskaj pramovy abo paviedamleńnia paśla bujnoj katastrofy, jak 11 vieraśnia 2001 hoda.

Na hetym uzroŭni mohuć dać rady tolki ludzi — i tamu ŭ kiraŭnikoŭ bujnych kampanij, jak praviła, jość realnyja pamočniki, jakija vykonvajuć hetyja zadačy. 

Ale što tyčycca bolš drobnych kampanij i vyrašeńnia rucinnych zadač — tut ŠI moža prydacca, asabliva kiraŭnikam, u jakich niama pamočnikaŭ i namieśnikaŭ.

Mnohija kiraŭniki adznačajuć, što vykarystoŭvajuć mahčymaści štučnaha intelektu pry padrychtoŭcy da kanfierencyj i sieminaraŭ — pry hetym redahujuć atrymanyja teksty z aporaj na ŭłasny vopyt i ŭłasnyja daśledavańni.

Kamuści štučny intelekt dapamahaje pieraadoleć piśmieńnicki kryzis abo zrabić čarnavik paviedamleńnia.

Taksama niekatoryja adznačajuć, što staviacca da ChatGPT jak da redaktara, bo jon dapamahaje skaracić doŭhija listy i zrabić paviedamleńni bolš łakaničnymi — sutnaść zastajecca toj ža, ale napisana lepš.

ChatGPT taksama moža vypraŭlać niedaskanałaści anhlijskaj movy ŭ kiraŭnikoŭ, dla jakich hetaja mova nie źjaŭlajecca rodnaj.

Šabłony — heta zručna, ale ci daduć jany plon biez čałaviečaha ŭmiašańnia?

Paśla nievialikaj karekciroŭki šabłonnyja paviedamleńni, stvoranyja ChatGPT, idealna pieradajuć niejtralny ton bolšaści karparatyŭnych paviedamleńniaŭ. Heta robić ich pryvabnymi dla kiraŭnikoŭ, nie schilnych da ryzyki.

Adnak kali načalnik choča, kab supracoŭniki mieli pra jaho ŭjaŭleńnie jak pra asobu z ułasnym myśleńniem, jamu treba danieści ŭłasny hołas — niachaj i na padstavie paviedamleńnia, stvoranaha kampjutaram.

Čytajcie jašče:

Hetaja prafiesija, pavodle daśledavańnia, zastajecca abaronienaj ad štučnaha intelektu. Raskazvajem, što za jana

Navukoŭcy pieraadoleli surjozny barjer u halinie kampjutarnaha dyzajnu

Novyja daśledavańni hienietykaŭ zmušajuć viarnucca da rasisckich teoryj ab «dobrych» i «drennych» hienach

• 1
• 0
• 0
• 0
• 1
• 1
• 1
• 0