Hetaja prafiesija, pavodle daśledavańnia, zastajecca abaronienaj ad štučnaha intelektu. Raskazvajem, što za jana
Jašče niadaŭna hetamu vidu čałaviečaj dziejnaści pradrakali kaniec z-za raźvićcia niejrasietak.
Navukoŭcy vyśvietlili, što na hety momant buchhałtaram nie pahražajuć masavyja zvalnieńni z-za raźvićcia štučnaha intelektu. Pra heta 24 krasavika raskazała ahienctva Euronews sa spasyłkaj na śviežaje daśledavańnie amierykanskaha Univiersiteta Bryhama Janha.
U hetym mašstabnym daśledavańni taksama ŭdzielničali 327 navukoŭcaŭ z 186 vyšejšych navučalnych ustanoŭ 14 krain śvietu. Daśledčyki skłali vielizarny ispyt, u jaki ŭnieśli 25181 ekzamienacyjnaje pytańnie pa buchhałtarskamu ŭliku, aŭdycie, finansavym uliku, kiraŭnickim uliku i padatkaabkładańni.
Zadańni byli roznymi pa składanaści i ŭklučali ŭ siabie testavyja pytańni, pytańni ź nieabchodnaściu dać karotkija adkazy i pytańni pa pryncypie «praŭda ci chłuśnia». Metaj ekśpierymientu było pravieryć pravilnaść adkazaŭ sapraŭdnych studentaŭ u paraŭnańni z dakładnaściu apošniaj viersii niejrasietki ChatGPT.
«U vyniku ChatGPT pieramoh studentaŭ u buchhałtarskim uliku i aŭdycie, nabraŭšy siaredni bał pa ŭsich pytańniach u 47,4 adsotka. Ale studenty pieraŭzyšli niejrasietku pa ŭsich astatnich dyscyplinach i faktyčna akazalisia lepšymi, dasiahnuŭšy siaredniaj adznaki ŭ 76,7%», — piša Euronews sa spasyłkaj na vyniki ekśpierymientu.
Štučny intelekt lahčej spraŭlaŭsia z pytańniami pa pryncypie «praŭda-chłuśnia» i testavymi zadańniami, a ŭžo sa składanymi matematyčnymi vyličeńniami i z karotkimi adkazami ŭ jaho ŭźnikali surjoznyja składanaści i pamyłki.
Aŭtary daśledavańnia zrabili vysnovu i zajavili, što ChatGPT i padobnyja jamu niejrasietki — heta nie ŭniviersalnaje rašeńnie, a sposaby padmanuć sistemu adukacyi isnavali i raniej. Tamu štučny intelekt u kantekście buchhałtarskaj prafiesii, na ich dumku, budzie tolki časovaj pieraškodaj i ŭ asnoŭnym budzie prymianiacca tolki ŭ jakaści dadatkovaha pamočnika biez zamieny čałavieka.
Charakterna, što jašče zusim niadaŭna było praviedzienaje inšaje daśledavańnie, jakoje ŭnosić buchhałtaraŭ u śpis tych, čyje pracoŭnyja miescy ŭ pieršuju čarhu z časam całkam zojmie štučny intelekt.
Ciapier čytajuć
«Upeŭnieny, jon i z kaniom kala arki pahavaryŭ». Rasijski žurnalist apisaŭ pryjezd Łukašenki na parad7
«Upeŭnieny, jon i z kaniom kala arki pahavaryŭ». Rasijski žurnalist apisaŭ pryjezd Łukašenki na parad
Doktarku Alenu Mikałajevu padčas vajny adpravili na Vaładarku za dapamohu habrejam — u XXI stahodździ tam ža apyniecca jaje praŭnučka Maryna Zołatava33
Kamientary