Biełaruski dalnabojščyk atrymaŭ vizu dla pracy ŭ polskaj firmie, a jana zbankrutavała. Jaho asudzili za niezakonny ŭjezd u Polšču
Pra toje, što dva hady tamu Siarhiej (imia źmieniena) niezakonna ŭjechaŭ v Polšču, jon daviedaŭsia vypadkova hetaj viasnoj. Polskija pamiežniki źniali jaho z aŭtobusa na pamiežnym pierachodzie «Brest — Terespal». U vyniku biełarus atrymaŭ try miesiacy ŭmoŭnaha terminu za parušeńnie, pra jakoje i nie padazravaŭ. Kaža: jašče lohka abyšoŭsia — mahło śviacić niekalki hadoŭ. Jak tak vyjšła, biełarus raskazaŭ vydańniu Most.
U 2023 hodzie Siarhiej atrymaŭ polskuju vizu i ŭładkavaŭsia kiroŭcam-mižnarodnikam u firmu z Čanstachovy. U pačatku 2024 hoda, kali termin dziejańnia pieršaj vizy padychodziŭ da kanca, pracadaŭca vydaŭ jamu novaje pracoŭnaje zaprašeńnie — dekłaracyju pra daručeńnie pracy inšaziemcu. Z hetym dakumientam Siarhiej padaŭ zajavu na vizu ŭ polskaje konsulstva ŭ adnym z abłasnych centraŭ Biełarusi.
Zdavałasia, usio idzie pa płanie, ale akurat tady vyśvietliłasia, što ŭ transpartnaj kampanii, dzie jon pracavaŭ, uźnikli finansavyja ciažkaści. Jana zbankrutavała praź niekalki miesiacaŭ paśla taho, jak vydała Siarhieju zaprašeńnie.
Daviedaŭšysia pra prablemy, biełarus staŭ šukać novaje miesca pracy. Znajšoŭ transpartnuju kampaniju, kudy jaho hatovyja byli ŭziać dalnabojščykam. Jašče adnu vizu jon rabić nie staŭ — ujechaŭ u Polšču pa vizie, atrymanaj dla pracy ŭ raniejšaha najmalnika. Ale ŭ novuju firmu ŭładkavaŭsia aficyjna: pracadaŭca atrymaŭ asobny dazvoł na jaho pracaŭładkavańnie.
Majučy na rukach pracoŭnuju damovu i viedajučy, što ź jaje spłačvajucca ŭsie padatki i sacyjalnyja ŭnioski, Siarhiej padaŭ dakumienty na polski DNŽ. Praŭda, tak jaho i nie dačakaŭsia — u kancy 2025 hoda znajšoŭ novuju pracu ŭ Łatvii, taksama ŭ śfiery mižnarodnych pieravozak. Usiaho ŭ druhoj polskaj kampanii jon adpracavaŭ kala paŭtara hoda.
«Zdymajuć z aŭtobusa i kažuć, što ja pavinien źjavicca ŭ Čanstachovu»
Ciapier u pašparcie mužčyny staić łatvijskaja viza. Viasnoj hetaha hoda ź joj jon aŭtobusam jechaŭ u Polšču. Ale na miažy jaho čakaŭ niepryjemny siurpryz.
«U Terespali mianie zdymajuć z aŭtobusa i kažuć, što ja pavinien źjavicca ŭ adździaleńnie Stražy hraničnaj u Čanstachovie», — apisvaje padziei surazmoŭca.
Mienavita tady jon daviedaŭsia, što da jaho ŭjezdu ŭ Polšču dva hady tamu jość pytańni.
U horad, dzie raniej pracavaŭ, Siarhiej pajechaŭ z usimi dakumientami: raniejšymi pracoŭnymi damovami, daviedkami pra vypłatu strachavych unioskaŭ, padatkovymi dekłaracyjami — chacieŭ rastłumačyć, što pracavaŭ lehalna i parušać zakon nie źbiraŭsia. Ale inśpiektar patłumačyŭ, što, choć praca była aficyjnaj, u Polšču jon ujechaŭ z parušeńniem zakona.
U pratakole kantrolu lehalnaści znachodžańnia Siarhieja ŭ Polščy napisana, što ŭ 2024 hodzie jon uvioŭ konsuła ŭ zman: padaŭ dekłaracyju pra daručeńnie pracy ŭ kampanii, viedajučy, što hety dakumient byŭ vydadzieny vyklučna dla atrymańnia vizy, «pakolki pracadaŭca nie mieŭ namieru jaho pracaŭładkoŭvać, a jon sam nie mieŭ namieru prystupać da pracy, paznačanaj u dakumiencie». Adpaviedna, i vizu atrymaŭ nieabhruntavana.
«Zatym, vykarystoŭvajučy nazvanuju vizu, padmannym šlacham, dziejničajučy sumiesna ź inšymi asobami, jakija afarmlali i pieradavali hety dakumient, i nasupierak patrabavańniam zakona pierasiok dziaržaŭnuju miažu Respubliki Polšča ŭ punkcie propusku Terespal — Brest», — havorycca ŭ pratakole.
Siarhieja dapytvali adrazu pa dźviuch spravach. Spačatku jak śviedku — pa spravie ab handli zaprašeńniami, potym jak padazravanaha — pa spravie ab niezakonnym pierasiačeńni miažy. U druhim vypadku jon sam pryznaŭ vinu, kab pakarańnie było minimalnym.
U vyniku mužčyna atrymaŭ try miesiacy ŭmoŭnaha terminu z adterminoŭkaj pakarańnia na hod. Kaža, kali b byŭ uparty, mahło śviacić ad troch do vaśmi hadoŭ.
«Łatvijskaja viza mianie vyratavała»
Pakolki ŭ Siarhieja była dziejnaja łatvijskaja viza, praceduru departacyi pamiežniki nie zapuskali, ale vydali jamu pradpisańnie nieadkładna vyjechać na terytoryju Łatvii.
«Hetaja viza mianie vyratavała. Mnie patłumačyli, što kali b ja atrymaŭ u Polščy kartu pobytu (dazvoł na žycharstva), to jaje b anulavali, bo ŭ momant padačy dakumientaŭ ja znachodziŭsia ŭ Polščy nielehalna. I była b departacyja».
U takim stanoviščy apynuŭsia nie tolki Siarhiej. Jon viedaje jašče adnaho biełarusa, jaki atrymaŭ zaprašeńnie ŭ toj ža firmie, jakaja zatym zbankrutavała.
Źmiena pracadaŭcy paśla pryjezdu ŭ Polšču — praktyka častaja. Ale Siarhiej miarkuje, što mienavita jaho były pracadaŭca pryciahnuŭ uvahu kantraloraŭ, bo niezadoŭha da zakryćcia kampanija vydała šmat zaprašeńniaŭ, ale nikoha z supracoŭnikaŭ tak i nie pracaŭładkavała.
35‑hadovy dalnabojščyk ź Biełarusi raptoŭna pamior u Kitai. Heta muž samaj tytułavanaj biełaruskaj dziudaistki
U Francyi ad śpioki zahinuŭ dalnabojščyk z Dokšycaŭ
Biełarusam za miažoj prapanujuć aformić pašpart RR i padzarabić — mutnaja schiema
Litoŭskaja mytnia pačała aryštoŭvać niekatoryja aŭtamabili, jakimi kirujuć biełarusy. Voś u čym prykoł
Ciapier čytajuć
Rabotnikam Centra alimpijskaj padrychtoŭki pa frystajle zabaranili iści na pachavańnie Mikałaja Kazieki15
Rabotnikam Centra alimpijskaj padrychtoŭki pa frystajle zabaranili iści na pachavańnie Mikałaja Kazieki
U Biełarusi zaćvierdzili praviły evakuacyi kaštoŭnaściaŭ na vypadak vajny: cehłu z Bresckaj krepaści z nadpisami buduć ratavać pierš za karciny Šahała i Sucina1515
Kamientary
Jahonaja pamyłka .
Pahrancy i palicyja heta MUS Polščy
( MSW )