«Heta jak u filmie žachaŭ. My nie viedajem, čaho jany ad nas chočuć». Dźviuch dziaŭčyn užo niekalki miesiacaŭ štodnia teraryzujuć čajki
Dźvie dziaŭčyny z horada Ńjukasł u Vialikabrytanii voś užo niekalki miesiacaŭ sutykajucca z anamalijaj: kožny dzień stroha ŭ vyznačany čas u ich dom sprabujuć uvarvacca ahresiŭnyja čajki. Tajamničuju historyju dziaŭčyn 25 krasavika raspaviało vydańnie The Times.
25-hadovaja miedsiastra Džardžyna Hrej i 26-hadovaja stamatołah Chelen Makivier spakojna žyli razam užo dva hady, ale pačynajučy z sakavika hetaha hoda da ich voknaŭ stali prylatać čajki. Z taho momantu kožnuju ranicu, dzień i viečar ptuški niaspynna sprabujuć trapić u ich kvateru.
Hetyja sproby adbyvajucca štodnia stroha z 6.30 ranicy da 6.30 viečara i supravadžajucca žorstkim stukańniem pa škle i dzikimi, zadušlivymi krykami.
«My nie viedajem, čaho jany chočuć. Heta jak u niejkim filmie žachaŭ: jany prosta siadziać ceły dzień, dzika kryčać, dziaŭbucca tak mocna, što až škło ledź vytrymlivaje, i viartajucca na nastupnuju ranicu a pałovie na siomuju. Heta poŭny kašmar», — paskardzilisia dziaŭčyny.
Pa ich słovach, suprać čajek nie dapamahali ni vyjavy katoŭ na voknach, ni šypy suprać ptušak. Tyja prosta skidali ich preč i praciahvali rabić toje, što i raniej.
Chelen i Džardžyna taksama źviartalisia pa dapamohu da haradskich uładaŭ, ale tyja admovili, spasłaŭšysia na «achoŭny» status» čajek navat pry ŭmovie ŭźniknieńnia z-za ich šumu ci biesparadkaŭ.
«My navat ad adčaju vyrašyli zahuhlić, kolki žyvuć čajki, sa spadzievam na toje, što jany prosta chutka zahinuć, ale jany žyvuć cełych 20 hadoŭ!» — aburana adznačyli dziaŭčyny.
Pryčyna hetaj anamalii dahetul nieviadomaja. Dziaŭčyny vielmi bajacca, što adnojčy ptuškam udasca prabracca ŭ ich dom i ŭčynić chaos.
«Kali heta adbudziecca, my adrazu adtul pierajedziem, a kvatera zastaniecca hetym žachlivym ptuškam», — padsumavali Chelen i Džardžyna.
«Zasiarodžusia na pracy z ZŠA». Cichanoŭski raskazaŭ pra svaje palityčnyja płany na 2026 hod22
Kamientary