Pasoł Ukrainy: My pierapisvalisia z Makiejem, ale jon nie adkazvaŭ, a tolki staviŭ «+»
24 lutaha 2022 hoda dla pasła ŭ Biełarusi Ihara Kizima pačaŭsia ŭ 05:30 ranicy. Jon jašče nie viedaŭ, što praz Čarnobylskuju zonu prajšli rasijskija vojski. Kiraŭnik MZS Biełarusi Uładzimier Makiej na jahonyja zvanki nie adkazvaŭ, raspavioŭ Kizim u intervju «Liha.net».
«U 06:30 ja sprabavaŭ datelefanavacca da ministra zamiežnych spraŭ Makieja. Jon nie braŭ trubku. Ja dasłaŭ jamu infarmacyju, jakuju pavinien byŭ pieradać kiraŭnictvu Biełarusi. Ja bačyŭ u WhatsApp, što jon jaje pračytaŭ — byli hałački. Adkazu nie było», — kaža Kizim.
Druhaja nota była kala 14:00. Tam užo havaryłasia, što Ukraina dakładna viedaje pra pačatak uvarvańnia ź Biełarusi. Heta była sproba spynić ahresiŭnyja dziejańni z boku Biełarusi.
Ale Makiej mnie ničoha nie adkazaŭ.
«Dziŭnaja historyja. My pierapisvalisia, ale jon staviŭ tolki «+». Potym my razmaŭlali padčas vizitu našaj delehacyi ŭ Biełaviežskuju pušču na pieramovy. Skazaŭ, što ŭsio pračytaŭ i paviedamiŭ. Adsutnaść adkazu ŭ dypłamatyi — heta taksama adkaz», — havoryć Kizim.
Jon raspavioŭ, što napiaredadni poŭnamaštabnaha ŭvarvańnia ministr abarony Biełarusi zapeŭnivaŭ ministra abarony Ukrainy Reźnikava, što pahrozy ź ich boku niama. «Byli zapeŭnieńni z usich pravaachoŭnych orhanaŭ. Taksama Załužny telefanavaŭ načalniku Hienštaba Huleviču. Taksama byŭ zvanok ad našaha kiraŭnika pamiežnaj słužby Siarhieja Dajneki za niekalki hadzin da pačatku ŭvarvańnia. A ŭsie miascovyja kiraŭniki siłavych struktur zapeŭnivali: «Nie, hetaha być nie moža, heta niapraŭda, my nie rychtujemsia», — uzhadvaje jon.
Jon miarkuje, što zaraz kantaktaŭ pamiž biełaruskimi i ŭkrainskimi viedamstvami niama.
«Chutčej za ŭsio, našy kiraŭniki zrazumieli, što tut nie zusim adekvatnyja ludzi. Mahčyma, kantakty i jość, ale nie na vysokim uzroŭni. Paśla 24 lutaha 2022 hoda suviazi praz ambasadu nie było», — kaža jon.
Pry hetym Kizim nie staŭ vyklučać nieaficyjnyja kantakty, ale varažyć na ich temu jon nie choča.
«Naša hałoŭnaja zadača — kab z terytoryi Biełarusi nie było napadu na Ukrainu. I dla hetaha ŭsie mahčymaści pavinny być vykarystany. Ci to asabisty pasłańnik, ci to prosta hramadskaja arhanizacyja — abmierkavać heta možna. Naprykład, kali išli pieramovy tut z rasijanami, ja ŭdzielničaŭ, ja viedaju, što adbyvałasia, jakija dakumienty prapanoŭvalisia. Heta było aficyjna. A što tut adbyvajecca… Dzie hetyja sustrečy — va Ukrainie, na placoŭkach ABSIE, AAN ci pryvozili niejkich emisaraŭ? Ad jakoj partyi? Ja nie chaču varažyć. Jość aficyjny kanał. Jon praduhledžvaje pryciahnieńnie MZS i ambasadara. Takoha nie było», — dadaŭ jon.
Kizim taksama raskazaŭ, što nie sustrakaŭsia z Łukašenkam z 2020 hoda.
«Paśla žniŭnia 2020 hoda ŭsie kantakty z kiraŭnictvam byli spynieny», — skazaŭ jon.
-
«Adčuvaje siabie vydatna»: Ksiuša z SMA, jakoj biełarusy sabrali $1,8 miljona, usio ž maje šaniec na doŭhačakany ŭkoł
-
Cichanoŭskaja raskazała pra samaje prostaje baćkoŭskaje žadańnie
-
42‑hadovaha žychara Michanavičaŭ adpravili za kraty — vierahodna, za Hajuna. Jon pracavaŭ na vytvorčaści buravoha instrumienta
Ciapier čytajuć
Novy pasoł Ukrainy pa pytańniach Biełarusi: «Pryznajom Cichanoŭskuju lidaram. A ŭ Łukašenki niama manapolii na hołas naroda»27
Kamientary