Ministr abarony ZŠA: Vosiem krain buduć pastaŭlać va Ukrainu tanki Leopard
Ministr abarony ZŠA Łojd Ościn, vystupajučy ŭ Brusieli na pasiadžeńni Kantaktnaj hrupy pa abaronie Ukrainy, znoŭ paćvierdziŭ prychilnaść sajuźnikaŭ pa NATA idei niezaležnaj i suvierennaj Ukrainy.
«Hiermanija, Polšča, Kanada, Partuhalija, Ispanija, Narviehija, Danija, Niderłandy buduć pastaŭlać va Ukrainu tanki Leopard», — zajaviŭ kiraŭnik Minabarony ZŠA Łojd Ościn.
Akramia hetaha, ZŠA, Polšča i Čechija pastaviać tanki ŭ dadatak da ŭžo adpraŭlenych. ZŠA, Hiermanija i Niderłandy pastaviać Ukrainie sistemy SPA Patriot, Francyja i Italija — sistemy SPA SAMP/T.
«Bolš za hod tamu Pucin dumaŭ, što za ličanyja dni jaho vojski zachopiać Kijeŭ i skinuć demakratyčny ŭrad Ukrainy. Jon dumaŭ, što mižnarodnaja supolnaść prosta źmirycca z hetym», — dadaŭ Łojd Ościn.
«Uvarvańnie Pucina stała doŭhaterminovym vyprabavańniem dla ŭsiaho śvietu», — dadaŭ ministr abarony. Ale siabry Ukrainy nie zavahalisia, i ŭ vyniku jana «vyjhrała bitvy za Kijeŭ, Charkaŭ i Chierson», praciahnuŭ Łojd Ościn.
Razam sajuźniki pa NATA ŭžo dali Ukrainie dapamohu ŭ pamiery 50 młrd dalaraŭ, skazaŭ jon, padkreśliŭšy, što mnohaje jašče treba budzie zrabić. Kreml usio jašče robić staŭku na toje, što z časam mižnarodnaja padtrymka Ukrainy asłabnie, vykazaŭ mierkavańnie ministr abarony ZŠA.
«Ale prajšoŭ hod, i my jak nikoli adzinyja», — padkreśliŭ jon.
Zaviaršajučy svajo vystupleńnie, Łojd Ościn dadaŭ, što ŭ hetym supraćstajańni z rasijskaj aŭtakratyjaj NATA pavinna adstojvać śviet, u jakim «praviły majuć značeńnie».
Cichanoŭskaja i Zialenski ŭpieršyniu praviali sustreču. Zialenski zaprasiŭ Śviatłanu ŭ Kijeŭ14
Kamientary