Dziŭnyja padziei ŭ zaaparku Dałasa. Tam pačali źnikać i hinuć žyvioły
Z pačatku studzienia ŭ zaaparku horada Dałasa ŭ štacie Techas pačali źnikać i pamirać žyvioły. Čaćviortym u cełaj sieryi padazronych incydentaŭ stała vykradańnie dźviuch małpaŭ. Da hetaha tam užo źbiahaŭ leapard, zahinuŭ pry dziŭnych abstavinach hryf i byli vyjaŭlenyja prałomy ŭ valjery ź inšymi małpami, piša Bi-bi-si.
Apošniaje źniknieńnie było vyjaŭlena nahladčykami ŭ paniadziełak, pra što jany nieadkładna paviedamili ŭ palicyju.
U zajavie zaaparka havorycca, što valjer z małpami byŭ «naŭmysna ŭskryty». Palicyja zhodnaja z tym, što chtości zrabiŭ prałom u aharodžy i vykraŭ prymataŭ.
Padazronyja niepryjemnaści ŭ zaaparku Dałasa stali adbyvacca ŭ pačatku studzienia, kali praź dzirku, zroblenuju ŭ aharodžy valjera, źbieh małady dymčaty leapard. Na ščaście, jon nieŭzabavie byŭ znojdzieny.
Tady ž supracoŭniki zaaparka vyjavili naŭmysna zroblenyja prałomy ŭ aharodžy valjera z małpami łanhurami. Ale małpy źbiehčy nie zdahadalisia abo palenavalisia.
Na minułym tydni ŭ svajoj kletcy byŭ znojdzieny miortvym redki ściarviatnik. Na płaniecie zastałosia nie bolš za 6500 asobin hetaha vidu. U ptuški, jak paviedamlajecca, była vielmi dziŭnaja rana, i jaje śmierć vyhladaje padazrona.
Supracoŭniki zaaparka kažuć, što nie mohuć źmirycca z hibiellu ŭsieahulnaha ŭlubionca, 35-hadovaha nubijskaha hryfa, i što im budzie vielmi jaho nie chapać.
Pakul palicyja admaŭlajecca kazać, ci źviazany pamiž saboj hetyja zdareńni (ci złačynstvy?). Prynamsi, padazravanyja nie nazvanyja, i aryštaŭ nie było.
Tym časam u zaaparku ŭstalavali dadatkovyja kamiery nazirańnia i ŭzmacnili patrulavańnie nočču.
Pa słovach vykanaŭčaha dyrektara Amierykanskaj asacyjacyi nahladčykaŭ zaaparkaŭ Eda Chansiena, padobna, što ŭ kahości majecca zub mienavita na zaapark Dałasa, choć u hetaj ustanovy vydatnaja reputacyja.
Heta najbujniejšy i najstarejšy zaapark Techasa, jon zajmaje vialikuju terytoryju, i ŭ im znachodzicca bolš za dźvie tysiačy vidaŭ žyvioł.
Aryštavany dyrektar Pałaca Respubliki, adzin z arhanizataraŭ Marafona adzinstva9
Kamientary