Jamu było 88 hadoŭ. Čarhiniec adziny z žyvych litarataraŭ mieŭ status narodnaha piśmieńnika Biełarusi.
Mikałaj Čarhiniec naradziŭsia 17 kastryčnika 1937 hoda ŭ Minsku. U maładości zajmaŭsia futbołam i vystupaŭ za niekalki savieckich kłubaŭ.
U 1963 hodzie skončyŭ Biełaruski dziaržaŭny instytut fizičnaj kultury, a ŭ 1967 hodzie — jurydyčny fakultet Biełaruskaha dziaržaŭnaha ŭniviersiteta. Z 1964 hoda słužyŭ u orhanach unutranych spraŭ, prajšoŭšy šlach ad supracoŭnika kryminalnaha vyšuku da načalnika ŭpraŭleńnia kryminalnaha vyšuku MUS BSSR. U 1984—1987 hadach byŭ daradcam u Afhanistanie. Mieŭ vučonuju stupień kandydata jurydyčnych navuk i zvańnie hienierał-lejtenanta ŭnutranaj słužby.
Jak piśmieńnik jon staŭ adnym z najbolš viadomych aŭtaraŭ tak zvanaha «milicejskaha detektyvu». Pisaŭ vyklučna na ruskaj movie. Napisaŭ kala paŭsotni knih, siarod jakich «Vam — zadanije», «Za siekundu do vystrieła», «Tajna Čiernych Hor», «Synov́ja», «Killer», «Pobieh», «Śmierť za śmierť» i inšyja. Pavodle jaho tvoraŭ byli źniaty mastackija i televizijnyja filmy.
Čarhiniec źjaŭlaŭsia adnoj ź simvaličnych fihur siarod praŭładnych litarataraŭ, u 2005—2022 hadach byŭ staršynioj praŭładnaha Sajuza piśmieńnikaŭ Biełarusi.
Taksama jon aktyŭna ŭdzielničaŭ i ŭ dziejnaści praŭładnych palityčnych struktur, z 1997 pa 2008 hod uznačalvaŭ Pastajannuju kamisiju Savieta Respubliki pa mižnarodnych spravach i nacyjanalnaj biaśpiecy.
Za ŭsio heta Mikałaj Čarhiniec byŭ uznaharodžany šmatlikimi dziaržaŭnymi ordenami i miedalami SSSR, Biełarusi i inšych krain. A ŭ 2022 hodzie jamu było prysvojena hanarovaje zvańnie «Narodny piśmieńnik Biełarusi» — upieršyniu za ŭsiu historyju jaho atrymaŭ litaratar, jaki nie pisaŭ pa-biełarusku.
Ciapier čytajuć
«Viedajecie, Łukašenka nie prezident». Jany tak uśmichnulisia, kiŭnuli». Departavany z Hruzii Leŭ Michiejeŭ raskazaŭ, jak ź im abychodzilisia ŭ Armienii33
Kamientary