«My nieprykmietna». Jak biełarusy ciapier jeduć u Anapu na adpačynak

Užo dva aŭtobusy ź biełarusami paciarpieli ad atak dronaŭ u Branskaj vobłaści Rasii. Navat dziaržsakratar Rady biaśpieki Biełarusi Alaksandr Valfovič zaklikaŭ biełarusaŭ ustrymacca ad pajezdak u Rasiju.

Ale pajezdki ŭ Krasnadarski kraj ź Biełarusi nie spynilisia, pakazała daśledavańnie DW, prosta ciapier aŭtobusy jeduć «padalej ad haradoŭ i naftabaz». A voś vybuchi i pieraboi sa śviatłom u anieksavanym Krymie na piaty hod poŭnamaštabnaj vajny narešcie spynili patok biełarusaŭ.

«Ciapier abjazdžajem Branskuju vobłaść»

Pad ataku dronaŭ u abodvuch vypadkach trapili aŭtobusy, jakija vieźli biełarusaŭ na adpačynak u Krasnadarski kraj Rasii, u Anapu i Hielendžyk.

17 červienia bieśpiłotnik atakavaŭ aŭtobus, u jakim jechała dziciačaja futbolnaja kamanda i supravadžajučyja asoby, paciarpieli šeść čałaviek, zahinuła žonka treniera.

2 lipienia ad drona paciarpieŭ aŭtobus Minsk — Anapa, unutry znachodziłasia 19 pasažyraŭ, dvoje kiroŭcaŭ byli lohka paranienyja. U abodvuch vypadkach ułady Rasii abvinavacili ŭ atacy ŭkrainskija vojski, va USU adchilali abvinavačvańni.

Paśla druhoha traplańnia dziaržsakratar Rady biaśpieki Biełarusi Alaksandr Valfovič zaklikaŭ ustrymacca ad pajezdak u pryhraničnyja vobłaści Rasii i adpačyvać na radzimie:

«Tam kožny dzień padajuć bieśpiłotniki, adbyvajucca takija drennyja vypadki. My nie zakryvali miežy, heta rašeńnie kožnaha — jechać ci nie jechać».

«My adrazu pamianiali maršrut! Praz Branskuju vobłaść bolš nie jedziem. Pierasoŭvajemsia biaśpiečnym maršrutam, praz Smalenskuju vobłaść, Tulskuju… Daroha biez zajezdu ŭ harady, pobač niama vajskovaj infrastruktury, naftabaz-naftaschoviščaŭ. Ničoha, tak by mović, z vajennaha punktu hledžańnia cikavaha… Spakojna jedziem, nikomu nie patrebnyja i nieprykmietnyja», — apisali DW u adnoj z turfirmaŭ, jakaja vozić biełarusaŭ na adpačynak u tym liku ŭ Krasnadarski kraj Rasii.

Pavodle słoŭ mieniedžara, padarožža padoŭžyłasia ŭsiaho na 2—3 hadziny, a košt zastaŭsia toj samy.

Prykładna hetak ža sama adkazali jašče ŭ dźviuch firmach.

«Usie dajazdžajuć, usio dobra, nichto nie skardzicca. Nu i było b zusim drenna, nie jechali b!» — pierakonvaje inšy mieniedžar.

Hałoŭny minus, pryznajuć turapieratary, u tym, što novyja abjaznyja darohi nie asabliva raźličanyja na turystaŭ, tam mienš prydarožnych kaviarniaŭ, horšyja ŭmovy na sanitarnych prypynkach, mienš prybiralniaŭ.

A voś samaja bujnaja kampanija z tych, kaho abzvońvali žurnalisty, adzin z najstarejšych šmatprofilnych turapierataraŭ Biełarusi, pajezdak u Krasnadarski kraj sioleta nie prapanuje.

«Prapanovy na sajcie — tolki ad našych partnioraŭ. My možam prapanavać vam Hruziju, Bałharyju», — adkazali tam.

«Ludziej z Kryma tolki zabirajem»

Turfirmy i pieravozčyki praciahvali apošnija hady adpraŭlać biełarusaŭ u anieksavany Rasijaj Krym. Pajezdka na aŭtobusie zajmała kala dvuch sutak — praz Rasiju i pa moście na paŭvostraŭ. Naprykład, adzin z varyjantaŭ na sajcie turfirmy: ź Minska praz Homiel u Kierč, Fieadosiju, Kaktebiel, i tut ža paznaka, što «ŭ vypadku fors-mažornych abstavin z Krymskim mostam» mahčymaja pierasadka ŭ mikraaŭtobusy abo na paromnuju pierapravu z dapłataj.

Kolki biełarusaŭ tam adpačyvała, nieviadoma, danyja nie ahučvajuć ni Rasija, ni Biełaruś. Kiraŭnik arhanizacyi «Biełarusy Kryma», jakaja dziejničaje na anieksavanym paŭvostravie, zajaviŭ, što ŭ 2024 hodzie tam adpačyła «kala 150 tysiač turystaŭ ź Biełarusi», biez spasyłki na krynicu infarmacyi.

U lipieni 2026 hoda na sajtach turapierataraŭ tury ŭ Krym pa-raniejšamu jość, ale na samoj spravie ich admianili.

«Chtości zaraz hatovy jechać u Krym?» — niedavierliva pierapytali žurnalistaŭ u turfirmie.

Jany razmaŭlali 6 červienia, u dzień, kali na anieksavanym paŭvostravie ŭnačy była tryvoha, ranicaj praktyčna nie było elektryčnaści, a bienzin pa-raniejšamu vydavali pa tałonach i nie bolš za 20 litraŭ u adny ruki.

«My zabrali turystaŭ, jakich užo adpravili, i ŭsio spynili. Prosta sajt jašče nie abnoŭleny», — patłumačyli mieniedžary.

«My całkam źniali hety kirunak. U Krasnadarski kraj jeździm, u Krym — užo nie, tam zaraz usio «cikaviej»… Rychtavalisia da siezonu i ŭ hetym hodzie, ale źniali ŭsie pajezdki, nakolki ja viedaju, inšyja kampanii taksama. I naŭrad ci situacyja sioleta źmienicca. Vybirajcie lepš Hruziju. Daražej, ale i zdaroŭje darahoje», — paraili ŭ inšaj turfirmie.

U hruzinskim Batumi jość i mora, i hory. Samalot ź Minska lacić čatyry hadziny i adpraŭlajecca niekalki razoŭ na tydzień

Dvoje sutak u aŭtobusie, ale i ŭdvaja nižejšyja ceny

Hałoŭny arhumient dla adpačynku ŭ Rasii — heta košt, a ŭ paraŭnańni z krainami ES — jašče i viza. Košt pajezdki ŭ Turcyju ci Jehipiet, tradycyjnyja miescy adpačynku biełarusaŭ, startuje ad 800 dalaraŭ z čałavieka za tydzień adpačynku, i dalej imkniecca ŭ biaskoncaść. A voś Krasnadarski kraj dastupny ad 300 dalaraŭ. Ale dabiracca treba ŭ aŭtobusie ad 35 hadzin i daŭžej.

Jak alternatyvu anieksavanamu Krymu i Krasnadarskamu kraju Rasii biełaruskija turapieratary pradajuć u pieršuju čarhu adpačynak u Hruzii i ŭ Abchazii (samaabvieščanaja respublika, z punktu hledžańnia mižnarodnaha prava źjaŭlajecca častkaj Hruzii). Dabiracca tudy možna samalotami, a možna — dvoje sutak u aŭtobusach praz Rasiju, u darozie zvyčajna jość prypynak na načleh. Košt adpačynku z aŭtobusam stanovicca nižejšym na 300—400 dalaraŭ.

Jość i novyja kirunki — naprykład, Dahiestan, «spakojny adpačynak, hory i mora», turfirmy abiacajuć i zabavy, ale «treba pamiatać pra dres-kod, nijakich adkrytych pupkoŭ».

Rasija ŭ 2025 hodzie była hałoŭnym kirunkam adpačynku dla biełarusaŭ. Tudy źjeździli 162,9 tysiačy čałaviek, pryvodzić danyja Respublikanski sajuz turystyčnych arhanizacyj (RSTA). Padzialiła ź joj pieršaje miesca Turcyja (162,5 tysiačy čałaviek), taksama ŭ top krain uvajšli Jehipiet (112 752), AAE (78 105), Hruzija (45 956), Kitaj (28 321), Italija (22 849), Tajłand (16 988), Hrecyja (11 374), Francyja (10 945). Danyja ŭklučajuć tolki tych, chto adpačyvaŭ z dapamohaj turfirmaŭ.

Pavodle danych RSTA, piaciorka lidaraŭ nie źmianiajecca z 2020 hoda.

«Rostam adznačanyja takija kirunki, jak Kitaj, Tajłand, Vjetnam dziakujučy zapusku rejsaŭ «Biełavija» ź Minska», — adznačyli ŭ arhanizacyi.

Tak, turpatok u Vjetnam vyras z 1855 adrazu da 8724 čałaviek. Usio bolš i turaŭ u Kitaj na vostraŭ Chajnań: pajezdka tudy na tydzień ź Minska abydziecca prykładna ŭ tysiaču dalaraŭ na čałavieka.

• 0
• 0
• 1
• 6
• 0
• 0
• 2
• 0