«Vitalur» moža ŭ chutkim časie zbankrutavać. Niekatoryja z rytejłu tolki i čakajuć

Surazmoŭcy «Našaj Nivy» źviartajuć uvahu na tryvožny stan sietki kramaŭ «Vitalur» i navat prahnazujuć jaje imaviernaje bankructva napačatku 2023 hoda. 

Asnoŭnaja prablema 27-hadovaj kampanii ŭ tym, što «Vitalur» uziaŭ praźmierna ambitny stratehičny kurs na admovu ad arendy pamiaškańniaŭ dla svaich kramaŭ i pabudovy ŭłasnych płoščaŭ.

«Vitalur» razharnuŭ vializnaje budaŭnictva, ale zdaryŭsia 2020-ty, represii, napad na Ukrainu i sankcyi ŭ adkaz. U vyniku banki skaracili finansavańnie budoŭlaŭ. 

Dla praciahu budaŭnictva «Vitalur» pačaŭ karystacca schiemaj svajho rodu karotkaha samakredytavańnia, zatrymlivajučy płaciažy pastaŭščykam. Zrabić usio «pryhoža» nie atrymałasia, i prablemy stali narastać komam. 

Dajšło da niepłaciažoŭ: da prykładu, u listapadzie 2022-ha pastaŭščyki padali zajavy na spahnańnie z «Vitalura» praz sud 4,8 młn rubloŭ, u śniežni (pa stanie na 15.12) — 1,5 młn rubloŭ. 

Dakładnaj spravazdačnaści «Vitalura» za 2022-hi ŭ dostupie jašče niama, ale i 2020-ty, i 2021 hod sietka spracoŭvała ŭ minus — 19,7 i 14,9 młn rubloŭ adpaviedna. 

Ad abaznanych surazmoŭcaŭ «Našaj Nivie» stała viadoma, što ŭ struktury doŭhu kampanii ciapier pieravažajuć karotkija daŭhi — blizka da 90%. Prykładna taki ž pracent byŭ i ŭ 2021-m (na sumu 376 młn rubloŭ). 

Takaja struktura doŭhu — niezdarovaja. 

Pavialičyć

«Heta čortava koła: kanflikty z pastaŭščykami viaduć da źnižeńnia asartymientu, što viadzie da źnižeńnia prybytku na namienkłatury tavaraŭ, što kiepska adbivajecca na pryvabnaści sietki dla pakupnikoŭ, što viadzie da nastupnaha paharšeńnia płaciežazdolnaści, što viadzie da źnižeńnia asartymientu, što viadzie… I asabliva kiepska na stan spravaŭ sietki paŭpłyvaŭ ukaz ab hetak zvanych «spraviadlivych cenach», — kažuć nam znajomyja ź situacyjaj u sietcy. 

«Dapamohi šukać niama adkul. U pryncypie, kankurenty nie asabliva chavajuć, što paradujucca finansavaj śmierci «Vitalura», bo heta možna budzie padać łukašenkaŭcam jak «pahladzicie, da čaho my dajšli!» i aściarožna patrabavać pasłableńniaŭ pa ŭkazie pa cenach, kab cenaŭtvareńnie adbyvałasia svabadniej, inakš taki los budzie čakać usie sietki, a «Vitalur» — prosta pieršy zvanočak», — dadaŭ mieniedžar adnoj z bujnych kramaŭ. 

Ci sprabuje «Vitalur» vychodzić sa stanovišča? 

Nam viadoma, što kampanii ŭdałosia atrymać u bankaŭ-kredytoraŭ adterminoŭku na pahašeńnie doŭhu. Ale času ŭsio adno zastajecca vielmi mała.

Kali b takaja situacyja zdaryłasia ŭ inšy hod, situacyju vyrašyŭ by prodaž častki nieruchomaści. «Vitalur» sprabuje pradać jak minimum 15 pamiaškańniaŭ u roznych miescach Biełarusi, u tym liku ŭ Minsku. Ale ŭ ciapierašnich umovach popyt na rynku mały, bo čakańni astatnich hulcoŭ rytejłu, taksama jak i inšych patencyjnych inviestaraŭ, piesimistyčnyja. 

Pakolki biznes u ciažkim stanoviščy i adčajna šukaje hrošy, ź jaho vybivajuć nieprymalnyja dyskonty. 

«U Biełarusi mała kamu treba i mała chto moža kupić. I ŭsie jany, kaniečnie ž, viedajuć pra ciažkaje stanovišča «Vitalura». I ŭsie jany čakajuć, bo viedajuć, što cana moža jašče ŭpaści», — tłumačyć surazmoŭca «Našaj Nivy». 

Kamientar kiraŭnictva «Vitalura» nam atrymać nie ŭdałosia. 

Siońnia «Vitalur» dekłaruje prysutnaść u 15 haradach Biełarusi, a taksama najaŭnaść 94 kramaŭ — pa hetym pakazčyku «Vitalur» druhi siarod sietak kram u krainie. 

«Vitalur» — siamiejny biźnies siamji Jacukoŭ. Baćka Alaksandr Jacuk zajmaje pasadu staršyni rady dyrektaraŭ, a jahonyja syny Vital i Juryj — kamiercyjnaha dyrektara i vykanaŭčaha dyrektara. Nazva «Vitalur» — heta składzienyja pieršyja litary imionaŭ synoŭ.

Biźnies Jacuka pačynaŭsia z aptovych pastavak ryby i morapraduktaŭ u biełaruskija kramy, ale ŭ niejki momant Jacuk vyrašyŭ zajści i ŭ roźnicu. Jacuki majuć pazityŭnuju reputacyju ŭ asiarodździ biełaruskaha biznesu jak ludzi, jakija «zrabili siabie sami» i nie byli zaŭvažanyja ŭ karupcyjnych schiematozach.

• 18
• 0
• 31
• 14
• 22
• 87
• 27
• 0