«Miarzotniki śviatoje padstaŭlajuć». Łukašenka vystupiŭ z zajavami pra padzieńnie rakiety ŭ Polščy
Alaksandr Łukašenka ličyć, što incydent z padzieńniem rakiety na terytoryi Polščy padobny da «dahavarniaka». Hetuju temu jon zakranuŭ padčas sustrečy z kiraŭnikom Udmurckaj Respubliki Alaksandram Bračałavym, piša BiełTA. Śćviardžeńni Alaksandra Łukašenki adnosna incydenta z rakietaj zaviedama chłuślivyja.
Jon źviarnuŭ uvahu, što nichto nie daje adkazu na šerah pytańniaŭ. «Čaho ž hetaja šalonaja rakieta, puščanaja ŭkrainskimi vajskoŭcami (a stralali na ŭschod — rakiety rasijskija źbivali ŭ kirunku uschodu), što ž jana tak raźviarnułasia i prajšła ŭ advarotny bok? Chaj prafiesijanały adkažuć na hetaje pytańnie. Hetak ža nie byvaje. Takich vypadkovaściaŭ nie byvaje, — ličyć Łukašenka. — Nu tak, možna skazać, što, viedajecie, rakieta za Lvoŭ užo palacieła rasijskaja, ledź nie ŭ bok Polščy, tamu S-300 raźviarnułasia i ŭžo stralała na zachad. Paŭstaje pytańnie: čaho ž vy stralali, ukraincy, u bok nataŭskaj dziaržavy? Nu i hałoŭnaje pytańnie, na što nichto nie adkazvaje, i amierykancy maŭčać: a ŭ hety momant, kali pusk rakiety S-300 ukraincy ažyćciaŭlali, pa čym jany bili, pa jakich abjektach? U hety čas nie było rakiet u pavietry. Maŭčać. I amierykancy maŭčać, nie havorać. Tamu što razumiejuć, što i my kantralujem hetuju terytoryju. I sioje-toje my bačym tut».
«Treba na elemientarnyja pytańni adkazać. Čamu mienavita padčas samitu dvaccatki raptam atakavali nataŭskuju dziaržavu, jak heta było pieršapačatkova pradstaŭlena. Viedajecie, ja bajusia rabić vysnovy, ale padobna da takoha dahavarniaka, što dalej niama kudy. Ale krychu nie raźličyli — ludzi zahinuli. I palakam treba adkazać ŭłasnamu nasielnictvu. Kiraŭnictvu Polščy treba adkazać pierad palakami, jak mahło tak zdarycca, čamu bili pa terytoryi Polščy, chto damoviŭsia, čamu rakieta raptam z uschodu na zachad paviarnuła i palacieła, i čamu ŭ toj momant stralali, kali ŭ pavietry nie było rasijskich rakiet. U hety momant nie było rakiet. Voś na hetyja pytańni treba adkazać, i ŭsio stanie zrazumieła», — skazaŭ jon.
«Viedajecie, miarzotniki dachodziać da taho, što śviatoje padstaŭlajuć», — padkreśliŭ Alaksandr Łukašenka.
U suviazi z hetaj situacyjaj Łukašenka pachvaliŭ Džo Bajdena: «Małajcy. Džo Bajden. Jamu treba addać naležnaje, što jon ščyra skazaŭ: «Prabačcie, nie rasijskaja (rakieta)».
«Tamu ciapier suprać nas idzie žorstkaja vajna, schvatka. I voś hety prykład pakazvaje. Apiaklisia i chucieńka sprabujuć, jak zładziei, zakryć hetuju temu. Užo jana na Zachadzie amal i nie abmiarkoŭvajecca. Nu, značyć, heta tolki pačatak. I jany škadujuć, palaki i ŭkraincy, što heta nie rasijskaja rakieta, jakaja lacieła. Im treba nas spravakavać, treba eskałacyja. Tamu nam treba hladzieć na našych ludziej, na našu ekanomiku. Ekanomika — asnova ŭsiaho. Budzie ekanomika — nam nie strašnyja nijakija vojny. Dumaju, kali boh jość na śviecie, jon chutka ŭsio heta vyśviecić», — zajaviŭ Łukašenka.
Śćviardžeńni Alaksandra Łukašenki adnosna incydenta z rakietaj zaviedama chłuślivyja. Incydent zdaryŭsia na fonie masiravanaj rasijskaj rakietnaj ataki na ŭkrainskija harady, kali było vypuščana kala 85 rakiet. Ich źbivali ŭ roznych kirunkach — u zaležnaści ad taho, dzie raźmiaščalisia ŭkrainskija procirakietnyja batarei. Jak adznačyli kiraŭniki ZŠA i Hiermanii, incydenta nie było b, kali b nie było rakietnych abstrełaŭ Ukrainy i, šyrej bieručy, vajny, saŭdzielnikam jakoj vystupaje i režym Łukašenki.
Pamiatajecie palitviaźnia Vituchnoŭskaha, jaki pajšoŭ vajavać za Rasiju? Jon užo zahinuŭ9
Pamiatajecie palitviaźnia Vituchnoŭskaha, jaki pajšoŭ vajavać za Rasiju? Jon užo zahinuŭ
«Siomaja DNK-ekśpiertyza paćvierdziła: Alaksiej ź biełaruskaj vioski Rymucieŭcy — baćka Chansa». Jak narviežac znajšoŭ baćku-biełarusa praz 78 hadoŭ77
Kamientary