U Pałac mastactva spuścili śpis niadobranadziejnych mastakoŭ. Patrabujuć prybrać z vystavy tracinu prac
10 listapada ŭ minskim Pałacy mastactva adkryłasia tryjenale dekaratyŭnaha mastactva «Dekart-22», dzie vystaŭleny pracy z kieramiki, škła i tekstylu talenavitych biełaruskich aŭtaraŭ. Ale ciapier z vystavy chočuć źniać ci nie tracinu prac. Źvierchu pastupiŭ sihnał, što častka mastakoŭ — palityčna niadobranadziejnyja.
Niekatoryja mastaki ŭ 2020 hodzie padpisali adkryty list suprać falsifikacyi vybaraŭ i hvałtu, u inšych blizkija svajaki ciapier u kałonii pa palityčnych artykułach, u kahości ŭ sacsietkach byli pratesnyja publikacyi. Z hetych pryčyn tvorcaŭ ciapier sprabujuć adchilić ad vystavy.
«Vystava pavinna pracavać da 9 śniežnia. U vyniku siońnia mohuć źniać pracy z ekspazicyi.
Čakajecca, što ad traciny da pałovy aŭtaraŭ buduć «vydalenyja» z vystavy. Mastaki čakajuć, chto ź ich u śpisach. Pakul usich prainfarmavali, što śpisy dajšli razam z patrabavańniem prybrać raboty, ale proźviščy nie nazvali», — skazała krynica «Našaj Nivy».
Pavodle jaje słoŭ, u vychadnyja vystava pracavała ŭ poŭnym abjomie.
«U paniadziełak vychadny, i za hety čas Sajuz mastakoŭ budzie sprabavać maksimalna vyratavać ekspazicyju — buduć pierakonvać «hałoŭnych mastactvaznaŭcaŭ» ź siłavych struktur i Ministerstva kultury, što kali prybrać častku prac, to ekspazicyja stracić cełasnaść, i što ŭsie aŭtary absalutna ideałahična biasškodnyja. Pakul niekatorym aŭtaram było rekamiendavana zamianić svaje proźviščy na podpisach pad tvorami», — adznačyła jana.
Infarmacyju pra heta paćvierdziŭ «Našaj Nivie» i adzin z mastakoŭ. Pavodle jaho słoŭ, śpisy pryjšli ŭ piatnicu ranicaj. Kolki ŭ ich čałaviek, jon nie viedaje.
«Adno zrazumieła: što kali ŭsich «niadobranadziejnych» źniać z ekspazicyi, to zała, napeŭna, zastaniecca pustoj, i vystava stanie niecikavaj. Ale, mahčyma, ja pamylajusia», — havoryć jon.
Ciapier čytajuć
Vučniaŭ, jakija z matam parvali ekzamienacyjnyja bilety pa historyi Biełarusi, prymusili vybačacca kala manumienta Pieramohi41
Kamientary