У Палац мастацтва спусцілі спіс нядобранадзейных мастакоў. Патрабуюць прыбраць з выставы траціну прац
10 лістапада ў мінскім Палацы мастацтва адкрылася трыенале дэкаратыўнага мастацтва «Дэкарт-22», дзе выстаўлены працы з керамікі, шкла і тэкстылю таленавітых беларускіх аўтараў. Але цяпер з выставы хочуць зняць ці не траціну прац. Зверху паступіў сігнал, што частка мастакоў — палітычна нядобранадзейныя.
Некаторыя мастакі ў 2020 годзе падпісалі адкрыты ліст супраць фальсіфікацыі выбараў і гвалту, у іншых блізкія сваякі цяпер у калоніі па палітычных артыкулах, у кагосьці ў сацсетках былі пратэсныя публікацыі. З гэтых прычын творцаў цяпер спрабуюць адхіліць ад выставы.
«Выстава павінна працаваць да 9 снежня. У выніку сёння могуць зняць працы з экспазіцыі.
Чакаецца, што ад траціны да паловы аўтараў будуць «выдаленыя» з выставы. Мастакі чакаюць, хто з іх у спісах. Пакуль усіх праінфармавалі, што спісы дайшлі разам з патрабаваннем прыбраць работы, але прозвішчы не назвалі», — сказала крыніца «Нашай Нівы».
Паводле яе слоў, у выхадныя выстава працавала ў поўным аб’ёме.
«У панядзелак выхадны, і за гэты час Саюз мастакоў будзе спрабаваць максімальна выратаваць экспазіцыю — будуць пераконваць «галоўных мастацтвазнаўцаў» з сілавых структур і Міністэрства культуры, што калі прыбраць частку прац, то экспазіцыя страціць цэласнасць, і што ўсе аўтары абсалютна ідэалагічна бясшкодныя. Пакуль некаторым аўтарам было рэкамендавана замяніць свае прозвішчы на подпісах пад творамі», — адзначыла яна.
Інфармацыю пра гэта пацвердзіў «Нашай Ніве» і адзін з мастакоў. Паводле яго слоў, спісы прыйшлі ў пятніцу раніцай. Колькі ў іх чалавек, ён не ведае.
«Адно зразумела: што калі ўсіх «нядобранадзейных» зняць з экспазіцыі, то зала, напэўна, застанецца пустой, і выстава стане нецікавай. Але, магчыма, я памыляюся», — гаворыць ён.
-
Ксёндз касцёла ў Жупранах грунтоўна адказаў на прэтэнзіі пра рамонт у храме, дзе пахаваны Багушэвіч
-
Уладзімір Някляеў з нагоды свайго 80‑годдзя напісаў сабе некралог — жартаўлівы і філасофскі
-
У Мінску зносяць міжваенную бальніцу працы французскага архітэктара. Знішчыць помнік дапамагалі два мясцовыя акадэмікі
Цяпер чытаюць
А мы вам казалі: «не думайце, што гэта капейкі»! Сталі вядомыя звесткі, колькі падаходнага беларусы Літвы пералічылі розным грамадскім структурам25
Каментары