WP: Bajden pryvatna prasiŭ Ukrainu pakazać adkrytaść da pieramoŭ z Rasijaj
Vydańnie Washington Post sa spasyłkaj na ŭłasnyja krynicy piša, što Administracyja Prezidenta Džo Bajdena ŭ pryvatnym paradku zaklikaje ŭkrainskich lidaraŭ pakazać adkrytaść da pieramoŭ z Rasijaj i pierahledzieć publičnuju admovu ŭdzielničać u mirnych pieramovach, kali Uładzimir Pucin nie budzie adchileny ad ułady, piša RBK.
Adnak heta robicca nie dziela taho, kab padšturchnuć Ukrainu da pieramoŭ, kažuć surazmoŭcy vydańnia. Jany nazyvajuć heta chałodnym raźlikam, jaki dapamoža zachavać padtrymku Kijeva z boku inšych dziaržaŭ, jakija sutykajucca z zaściarohami svaich vybarščykaŭ nakont taho, što vajna va Ukrainie raściahniecca na šmat hadoŭ.
Raniej rasijskija aficyjnyja asoby nie adnojčy zajaŭlali pra hatoŭnaść sieści za stoł pieramoŭ, ale tolki na rasijskich umovach. Kijeŭ ža adkazvaŭ, što pieramirje tolki dapamoža Maskvie, bo daść joj čas dla padrychtoŭki da novaha nastupu. Sa słoŭ ukrainskich uładaŭ, tolki poŭnaje viartańnie ŭsich akupavanych Rasijaj terytoryj moža prynieści doŭhaterminovy mir.
Jak piša vydańnie, amierykanskija čynoŭniki padzialajuć pazicyju Uładzimira Zialenskaha, ale pry hetym pryznajuć, što admaŭleńnie prezidentam Ukrainy pieramoŭ z Rasijaj vyklikała zaniepakojenaść u niekatorych krainaŭ Jeŭropy, Afryki i Łacinskaj Amieryki, u jakich asabliva vostra adčuvajecca ŭpłyŭ vajny praz rost cen na pradukty charčavańnia i paliva.
Akramia taho, pieraściarohi z nahody zaciahvańnia kanfliktu jość i ŭ krain, jakija tak i nie rašylisia padtrymać kaalicyju dapamohi Ukrainie z-za svaich suviaziaŭ z Maskvoj albo z-za niežadańnia stać u adzin šerah z Vašynhtonam.
Naprykład, PAR ustrymałasia na niadaŭnim hałasavańni ŭ AAN suprać anieksii Rasijaj čatyroch ukrainskich rehijonaŭ, zajaviŭšy, što zamiest hetaha śviet pavinien zasiarodzicca na sadziejničańni spynieńniu ahniu i palityčnym urehulavańni. Niadaŭna abrany prezident Brazilii Łuis Inasiu Łuła da Siłva śćviardžaŭ, što Zialenski niasie takuju ž adkaznaść za vajnu, jak i Pucin.
Premjer-ministr Indyi Narendra Modzi, jaki imkniecca padtrymlivać dobryja stasunki i z Maskvoj, i z Kijevam, u minułym miesiacy ŭ razmovie ź Zialenskim prapanavaŭ dapamohu ŭ praviadzieńni mirnych pieramoŭ. Ukrainski lidar admoviŭ jamu.
Pamierła 39-hadovaja eks-palitźniavolenaja Hanna Kandracienka. U kałonii ŭ jaje znajšli rak, ale nie vyzvalili27
Kamientary