Amal usio žyćcio pracavaŭ ź lesam, dačka viadzie sacsietki pa-biełarusku. Što viadoma pra novaha kiraŭnika spraŭ Łukašenki

Kiraŭnictva spraŭ — heta vializnaja biznes-imperyja, jakaja abjadnoŭvaje dziasiatki samych roznych abjektaŭ: dziciačyja lahiery, sanatoryi, haścinicy, restarany, fabryki mastackich vyrabaŭ i inšaje. U strukturu Kiraŭnictva taksama ŭvachodzić Departament humanitarnaj dziejnaści.

Novym kiraŭnikom struktury staŭ Jury Nazaraŭ, jaki da hetaha dva hady byŭ vice-premjeram, adkaznym za budaŭnictva, naftachimiju i drevaapracoŭku. Chto jon taki i čym viadomy?

U dzień pryznačeńnia Juryju Nazaravu spoŭniłasia roŭna 60 hadoŭ. Sam jon rodam z Horak Mahiloŭskaj vobłaści. Miascovyja žychary raskazali Svabodzie, što adtul była rodam maci čynoŭnika Kłara, a baćka Viktar byŭ ź Viciebsku. Baćki pabralisia šlubam, kali byli na druhim kursie miascovaj sielskahaspadarčaj akademii. U chutkim časie ŭ ich źjaviŭsia pieršyniec — Jury.

U vyniku Juryja hadavali dzied z babulaj — matčyny baćki. Jany žyli va Ŭljašynie, što za 10 kilametraŭ ad Horak. Škołu Nazaraŭ kančaŭ užo ŭ rajonnym centry. Sami ž baćki Nazarava potym žyli ŭ Kiraŭskim rajonie Mahiloŭščyny.

Paśla škoły Jury pastupiŭ u Technalahičny instytut na specyjalnaść «Lasnaja haspadarka». Pracavać viarnuŭsia na radzimu. Spačatku byŭ laśničym u Zubraŭskim laśnictvie. A ŭ 1988 hodzie staŭ dyrektaram Horackaha lashasu.

U 2001 hodzie Nazarava zabirajuć na pasadu namieśnika staršyni Kamitetu lasnoj haspadarki. Jak tolki ŭ 2004 hodzie ŭtvarajecca ŭžo Ministerstva lasnoj haspadarki, to Nazaraŭ pierachodzić na pracu tudy namieśnikam ministra.

U 2010 hodzie Jury Nazaraŭ traplaje na pracu ŭ Kiraŭnictva spraŭ Łukašenki, dzie stanovicca namieśnikam Mikałaja Korbuta. Jak tolki strukturu ŭznačalvaje Šejman, to miesca Nazaravu ŭžo nie znachodzicca, jaho pieravodziać kiravać kancernam «Biellesbumpram».

Na hetaj pasadzie jon dastatkova redka fihuravaŭ u ŚMI. Chiba što jarkim staŭ vypadak u lipieni 2015 hodu, kali niekalki sotniaŭ rabočych Dobruskaj papiarovaj fabryki zładzili zabastoŭku. Rabočyja byli kitajcy. Nazaraŭ tady zajaŭlaŭ, što zavadataraŭ departujuć ź Biełarusi.

U sakaviku 2020 hodu Nazarava pryznačajuć vice-premjeram. U kastryčniku 2021 hodu jon kazaŭ, što straty biełaruskaha NPZ praz sankcyi skłali kala 80 miljonaŭ dalaraŭ. Nazaraŭ zajaŭlaŭ, što ŭ kožnaha pradpryjemstva jość svoj recept baraćby z sankcyjami. Sam u sankcyjnyja śpisy zachodnich krain čynoŭnik nia trapiŭ.

Nazaraŭ časta inspektavaŭ biełaruskija pradpryjemstvy ŭ roznych haradach, adkazvaŭ za pieramovy pa nafcie, taksama ŭ sferu jaho paŭnamoctvaŭ uvachodziła Astravieckaja AES.

Jury Nazaraŭ žanaty. Jahonaja žonka pracuje lekaram. Adzinaja dačka Viktoryja taksama pajšła šlacham maci, skončyła Biełaruski dziaržaŭny medyčny ŭniversytet.

Na sajcie ŭniversytetu navat jość charaktarystyka Viktoryi Nazaravaj: «Adkaznaja i pracalubivaja, u stasunkach z vykładčykami i adnakurśnikami dobrazyčlivaja, taktoŭnaja. Karystajecca zasłužanaj pavahaj i aŭtarytetam u kalektyvie».

Ciapier Viktoryja pracuje anestezijolaham-reanimatolaham u RNPC dziciačaj chirurhii ŭ Miensku, joj 28 hadoŭ. Admietna, što svoj instahram jana apošnim časam zbolšaha viadzie pa-biełarusku. Viktoryja šmat padarožničaje, jak pa Biełarusi, hetak i pa eŭrapiejskich i azijackich krainach.

U Juryja Nazarava jość dva braty i dźvie siastry. Brat Michaił pracuje chirurham u rasiejskim Sočy, jon skončyŭ Viciebski medyčny ŭniversytet. Jašče adzin brat Alaksandar žyvie ŭ Kiraŭskim rajonie.

Siastra Iryna žyvie ŭ Viciebsku, pracuje vykładčykam muzyki. Jašče adna siastra Łarysa pracavała medsiastroj pad Mahilovam.

• 16
• 0
• 6
• 7
• 8
• 5
• 4
• 0