«Sankcyi na svaich ža?» Ekanamist — pra zabaronu zamiežnym ułaśnikam biełaruskich kampanij pradavać doli i akcyi
Urad Biełarusi zabaraniŭ 190 kampanijam z zamiežnym kapitałam svabodna pradavać doli ci akcyi. Heta biznes, jaki, na pohlad uładaŭ, naležyć asobam z «niedružalubnych» dziaržaŭ. Pad sankcyi trapili «Jeŭraopt», EPAM Systems, «Lidskaje piva» i inšyja pradpryjemstvy. Spytali ŭ ekanamista, što heta značyć dla biełaruskaha biznesu i rynku inviestycyj.
Kampanijam, jakija trapili ŭ ahučany śpis, zabaranili apieracyi pa adčužeńni akcyj ci dolaŭ, jakija, zhodna z zahadam Minfina, błakujucca na rachunkach uładalnikaŭ. Ciapier akcyi hetych kampanij nielha pieradać inšym akcyjanieram.
Takija dziejańni na terytoryi Biełarusi ciapier pravamiernyja, ale ahułam situacyja całkam nienarmalnaja, kamientuje akademičnaja dyrektarka Centra ekanamičnych daśledavańniaŭ BEROC Kaciaryna Barnukova.
«Heta, pa sutnaści, parušeńnie bazavaha prava na ŭłasnaść, jakoje składajecca nie tolki z prava vałodać, ale i z prava pradavać toje, čym ty vałodaješ, — zaŭvažaje ekśpiertka. — Kali b u našaj krainie byŭ narmalny fondavy rynak, to akcyi takich kampanij adrazu b zhubili ŭ košcie».
Ale i biez hetaha samo pryniaćcie takoj pastanovy škodzić kampanijam.
«Niemaleńkaja častka kampanij sa śpisu — heta biełaruskija ž hrošy i inviestary (naprykład, EPAM Systems, toj ža «Jeŭraopt» ci «Alutech»), jakija prosta zachodziać praz karparacyi, stvoranyja ŭ inšych krainach, tamu što tam lepšaje karparatyŭnaje prava ŭ paraŭnańni ź Biełaruśsiu (nie kažučy pra abaronu prava na ŭłasnaść, jakoje, jak pakazvajecca ŭ čarhovy raz, u nas ničoha nie kaštuje). Atrymlivajecca, što sankcyi nakładvajucca na svaich ža? Niezrazumieła, u čym tut vyjhryš dla biełaruskaj dziaržavy, heta čarhovaje stralańnie sabie ŭ nahu, kab «niepanadna było».
Pryniataje rašeńnie źjaŭlajecca reakcyjaj na namier niekatorych zamiežnych kampanij syści ź Biełarusi paśla pačatku vajny va Ukrainie.
«Finski inviestar «Lidskaha piva» adrazu paśla pačatku vajny vykazaŭ namier vyjści ź inviestycyj i znajści pakupnika na svoj pakiet akcyj u Biełarusi. Pastanova robić hety krok niemahčymym, ale ŭ realnaści, u siońniašniaj situacyi, jany naŭrad ci znajšli b pakupnika i tak. Moža, tolki rasijskamu inviestaru prapanavali b», — zaŭvažaje Kaciaryna Barnukova.
Najbolš ža surjoznym nastupstvam pryniataj pastanovy stanie jašče bolšy padryŭ imidžu krainy ŭ płanie pryvabnaści dla inviestycyj.
«Pračytaŭšy takuju navinu, da nas nie zachočuć prychodzić novyja zamiežnyja inviestary. Ale śpis pakazvaje, nakolki ŭ nas ich i tak mała — 190 kampanij na ŭsiu krainu, miakka kažučy, niesurjozna», — zaŭvažaje naša surazmoŭca.
«Jeŭraopt», EPAM, «Chienkiel». Ułady Biełarusi zabaranili zamiežnym ułaśnikam pradavać svaje doli i akcyi
Lehienda sychodzić: finskija zasnavalniki vyrašyli pradać «Lidskaje piva» i šukajuć pakupnikoŭ
Błohier Siaroha z Rasii pryjechaŭ na Zybickuju z kachanaj błohierkaj Aniečkaj. Vynik: źbity im biełarus u komie, a Siaroha na 5,5 hoda za kratami10
Kamientary