«Kančatkova pieraaryjentavalisia na absłuhoŭvańnie rasijskich intaresaŭ». Chto čytaje biełaruskija prapahandysckija resursy
Telehram-kanał «Biełaruski paradak» praanalizavaŭ pracu ajčynnych prapahandysckich sacsietak i pryjšoŭ da vysnovy, što siarod ich padpisčykaŭ biełarusaŭ minimum.
Vydaleńnie «Žiełtych ślivov» i kanała HUBAZiK «nosić sistemny charaktar, što nie moža nie radavać. Tamu preparuju mietady i mety ich pracy, kab było zrazumieła, jakoha instrumienta pazbaviŭsia režym», — piša aŭtar.
Na jaho dumku, raspaŭsiudžana pamyłkovaje mierkavańnie, što ich aŭdytoryjaj źjaŭlajecca jadziernaja aŭdytoryja Łukašenki.
«Spačatku tak jano i było. Ale takich nabirałasia niahusta — niešmatlikija aktyvisty, siłaviki, supracoŭniki turmaŭ, biudžetniki pad prymusam. Heta byŭ rańni pieryjad, z momantu stvareńnia pa kaniec 2020. Klučavoj zadačaj była dehumanizacyja i rasčałaviečvańnie apanientaŭ, z čym jany i spravilisia».
Ale potym, piša aŭtar, asnoŭnymi spažyŭcami i raspaŭsiudžvalnikami kantentu stali mienavita apanienty režymu.
«Asabista mianie zaŭsiody złavała, kali našy ludzi samastojna hladzieli i pierasyłali hetuju dzičynu znajomym. Ja razumieju, kali prapahandu vyčytvajuć ludzi, kamu za heta płaciać — žurnalisty, analityki, prafiesijnyja manitory. Abo błohiery, jakija šukajuć sakavityja momanty dla svajho praduktu. Ale astatnija — navošta? Heta jak sam pajeŭ hałubcoŭ z łajnom, dyk jašče i pabieh znajomych častavać.
Śmiech-śmiecham, ale heta była najčystaja atakujučaja prapahanda, nacelenaja na dyzmaral i šakavańnie apanienta (dehumanizacyja nie spyniałasia). Časam heta ŭdavałasia, asabliva kali išli nie ŭ łabavuju ataku, a pracavali bolš tonka, zmušajučy sumniavacca ŭ vidavočnych rečach».
Nastupny etap transfarmacyi, pavodle infarmacyi kanała, adbyŭsia napiaredadni rasijskaha ŭvarvańnia va Ukrainu.
«Da taho momantu biełdziaržcialeha kančatkova pieraaryjentavałasia na absłuhoŭvańnie rasijskich intaresaŭ. Usie historyi pra haładajučy Zachad, raśpiatych chłopčykaŭ, ukry sami siabie bambiać ‒ jany nie nadta cikavyja biełarusam. Što i pryviało da cikavaha fienomienu — asnoŭnymi spažyŭcami režymnaj prapahandy stali naohuł nie biełarusy, a rasiejcy.
Asabliva vyrazna heta vidać pa jutubie, dzie administracyja pavaliła kanały fiederalnych miedyja i klučavych prapahandystaŭ.
Biednyja rasijanie, nie majučy mahčymaści atrymać injekcyju Sałaŭjova ŭ mozh, stali hladzieć našych «hosaŭ». Hetym i tłumačacca miljonnyja prahlady na asobnych rolikach. A nie tym, što raptam biełarusy palubili BT i ANT».
Padobnaja situacyja, pavodle źviestak «Biełaruskaha paradku» i ŭ telehramie.
«Pieršapačatkova sietku «biełhosaŭ» raskručvała rasijskaja sietka (Viciazieva, Hasparan i inšyja), dapamahajučy nabrać pieršuju aŭdytoryju. Dalej niejki čas pychkali na svajoj ciazie, pieryjadyčna padlivajučy botaŭ ci padpisvajučy biudžetnikaŭ pa raznaradcy. A z pačatkam vajny pajšoŭ užo naturalny rasijski trafik, što pryciahvaŭsia kantentam, jaki nie maje da Biełarusi nijakaha dačynieńnia».
Aŭtar kanała ličyć, što ŭ hetym i kryjecca sakret statystyki prahladaŭ i padpisčykaŭ.
«Pa maich acenkach, prykładna 60-70% aŭdytoryi «ŽS» składali rasijanie. Heta stała jasna, kali jany śpiešna nakručvali aŭdytoryju, haniajučy repost mienavita pa rasijskaj sietcy (detalova možna ahledzieć na «ThStacie»).
Realny pamier režymnaha siehmienta Telehrama — nie bolš za 30 tysiač karystalnikaŭ».
Z nahody infarmacyjnaha śpiecnaza, jakim pałochaŭ Łukašenka, aŭtar piša, što, z dośviedu, pryciahnuć novuju aŭdytoryju jany nie ŭ siłach, ale «padzas*ać ekasistemu, siejać dezu, jany mohuć».
«Tamu prostaja parada: samy efiektyŭny sposab supraćstajać prapahandzie — nie čytać jaje. I sumniavacca, zadavać pytańni, pierapraviarać. Bo, u kančatkovym rachunku, praŭda na našym baku. Niemahčyma biaskonca nazyvać čornaje — biełym, biednaje — bahatym, archaičnaje — sučasnym. Kab razburyć hety štučny śviet i pakazać jaho ŭbohaść, ničoha prydumlać nie treba. Dastatkova prosta pastavić lusterka».
Kamientary