Hienštab Ukrainy: Biełaruskija vojski minirujuć pamiežnuju z Polščaj i Ukrainaj terytoryju Biełarusi
Namieśnik načalnika hałoŭnaha apieratyŭnaha kiravańnia Hienieralnaha štaba Uzbrojenych sił Ukrainy Alaksiej Hromaŭ zajaviŭ, što biełaruskija vojski pačali miniravać pamiežnuju z Ukrainaj i Polščaj terytoryju.
«Asnoŭnyja vysiłki Uzbrojenych sił Biełarusi kancentrujucca na viadzieńni raźviedki, inžyniernym abstalavańni svaich pazicyj, a taksama na mierach bajavoj padrychtoŭki. Aproč taho, ažyćciaŭlajecca miniravańnie padjaznych šlachoŭ, lasnych daroh i mastoŭ u pamiežnych z Ukrainaj rajonach Bresckaj vobłaści, uzdoŭž dziaržaŭnaj miažy Ukrainy z Polščaj da kirunku Aleŭsk — Navahrad-Vałynski (Žytomirskaja vobłaść)», — zajaviŭ Alaksiej Hromaŭ 2 červienia na bryfinhu ŭ Kijevie.
U toj ža čas, pavodle jaho, ukrainskaja vajskovaja raźviedka nie naziraje farmavańnia na vałynskim i paleskim kirunkach udarnych padraździaleńniaŭ dla nastupleńnia z terytoryi Biełarusi. Adnak, imaviernaść rakietnych abstrełaŭ ukrainskaj terytoryi pa-raniejšamu zachoŭvajecca.
Z 1 červienia Dziaržaŭny pamiežny kamitet Biełarusi ŭvioŭ abmiežavańni na ŭvachod, ujezd i časovaje znachodžańnie hramadzian u pamiežnaj pałasie ŭ troch rajonach Homielskaj vobłaści na miažy z Ukrainaj — Brahinskim, Chojnickim i Łojeŭskim.
Abmiežavańni ŭvodziacca z 1 červienia pa 31 žniŭnia «ŭ metach pamiežnaj biaśpieki», paviedamlaŭ Pamiežny kamitet 28 maja. Pra abmiežavańni ŭ pamiežnych rajonach Bresckaj vobłaści ničoha nie paviedamlałasia.
Ciapier čytajuć
Pašparty biełarusaŭ, jakija hałasujuć na vybarach u KR, apracuje kampanija, u jakoj apošniuju ŭciečku vyjavili ŭ 2026-m, a zasnavalniki — rasijanie7676
Kamientary