Dobkin raspavioŭ, kolki supracoŭnikaŭ EPAM zastaniecca ŭ Biełarusi ŭ kancy 2022 hoda
EPAM płanuje pamienšyć štat u Biełarusi i Ukrainie jak minimum na 6 tysiač čałaviek da kanca 2022 hoda, padličyŭ dev.by na padstavie słoŭ Arkadzia Dobkina.
Prezident i CEO EPAM Arkadź Dobkin padčas štokvartalnaha sazvonu ź inviestarami padzialiŭsia niekatorymi detalami rełakiejtu supracoŭnikaŭ ź Biełarusi, Ukrainy i Rasii. Sazvon adbyŭsia 5 maja.
— Da kavidu štat va Ukrainie, Biełarusi i Rasii nabližaŭsia da 70% ad našych ahulnych vytvorčych mahutnaściaŭ (production capacity). Da kanca 2021 hoda hetaja dola była mienšaj za 60%. My spadziavajemsia, što da kanca 2022 hoda nam udasca skaracić naš vytvorčy štat u rehijonie prykładna da 30%, — skazaŭ Dobkin.
Adkazvajučy na pytańnie adnaho z udzielnikaŭ razmovy, kiraŭnik EPAM jašče raz padkreśliŭ:
— My spadziavajemsia, što da kanca hoda Biełaruś i Ukraina buduć składać nie bolš za 30% ad našych mahutnaściaŭ.
Što heta značyć?
EPAM publikuje ličby ab pamiery svajho štatu ŭ roznych łakacyjach u štohadovych spravazdačach. Tak, u kancy 2021 hoda ŭ ofisach EPAM pa ŭsim śviecie pracavała 58,8 tysiačy čałaviek. Ź ich 52 617 składali vytvorčyja śpiecyjalisty, pra jakich kaža Dobkin.
Pad vytvorčym štatam majucca na ŭvazie supracoŭniki kampanii, jakija pracujuć na IT-prajektach. Heta nie tolki inžyniery, ale i biznes-analityki, mieniedžary, dyzajniery i inšyja śpiecyjalisty.
Pa słovach kiraŭnika EPAM, va Ukrainie i Biełarusi da kanca 2022 hoda zastanucca kala 30% vytvorčych śpiecyjalistaŭ — heta značyć, prykładna 15,8 tysiačy čałaviek.
Na kaniec minułaha hoda ŭ ofisach kampanii ŭ Biełarusi pracavała 9416 vytvorčych śpiecyjalistaŭ (kamanda ŭpieršyniu ŭ historyi ofisa skaraciłasia), va Ukrainie — 12389. Usiaho — 21806 čałaviek, i 30738 z ulikam rasijskaha ofisa — kala 60% ad ahulnych vytvorčych mahutnaściaŭ.
Takim čynam, EPAM płanuje skaracić vytvorčy štat u rehijonie (Biełaruś, Ukraina i Rasija) amal na 15 tysiač čałaviek.
Taksama heta značyć, što ź Biełarusi i Ukrainy buduć rełakavanyja da kanca hoda nie mienš za 6 tysiač supracoŭnikaŭ EPAM (a z ulikam mahčymaha pierajezdu ŭ Biełaruś niekatoraj kolkaści byłych supracoŭnikaŭ rasijskaha ofisa kampanii — navat bolš).
Taksama varta pamiatać, što najm u Biełarusi zamarožany.
Ale ŭ krasaviku stała viadoma, što EPAM znoŭ najmaje supracoŭnikaŭ va Ukrainie. Tady ž u kampanii raspaviali, što terytoryju Ukrainy pakinuli «niekalki tysiač» supracoŭnikaŭ EPAM, ale nie ŭdakładnili, u jakich ofisach jany siońnia pracaŭładkavanyja. Da vajny Ukraina była najbujniejšaj łakacyjaj śpiecyjalistaŭ EPAM.
U jakija krainy rełakuje EPAM?
— Kali ja pačnu pieraličvać usie krainy, u jakich znachodziacca našy ludzi prosta ciapier, heta zojmie ŭvieś čas da kanca našaj razmovy, — kaža Dobkin. — Jość niekalki śpiecyfičnych rehijonaŭ. Adna z klučavych łakacyj — viadoma, Polšča. Ale nie tolki jana. Heta krainy ŭ Centralnaj Azii, krainy typu Turcyi i Sierbii. < … > U niejkich situacyjach nam davodziłasia pieravozić ludziej vielmi chutka. Finalnym punktam pryznačeńnia moža być ZŠA ci Kanada — heta zaležyć ad ludziej, ad ich pracoŭnych navykaŭ.
Ciapier čytajuć
Były palitviazień znajšoŭ u Vilni padpracoŭku ŭ čacie — i trapiŭ pad kryminałku za pravakacyi suprać Ukrainy7
Kamientary