Minzdaroŭja prypyniła dziejańnie licenzij na dziejnaść miedcentraŭ «Łade» i «Klinika A1»
Rašeńnie ab prypynieńni licenzij dvuch miedcentraŭ było pryniataje na pasiadžeńni lačebna-kantrolnaj rady Ministerstva achovy zdaroŭja 4 maja. Na im razhladalisia «pytańni parušeńniaŭ vykanańnia zakanadaŭstva ab achovie zdaroŭja, ab sanitarna-epidemičnym dabrabycie, ab licenzavańni ŭ hetych arhanizacyjach».
U dziejnaści zhadanych miedcentraŭ kamisija Minzdaroŭja, pavodle aficyjnaha paviedamleńnia, vyjaviła šmat parušeńniaŭ, jakija nibyta i stali pryčynaj pryniataha rašeńnia.
«Łade»:
- ažyćciaŭleńnie pradprymalnickaj dziejnaści ŭ miescy, nie paznačanym u licenzii;
- parušeńni patrabavańniaŭ kliničnych pratakołaŭ dyjahnostyki i lačeńnia;
- najaŭnaść lekavych srodkaŭ, u jakich vyjšaŭ termin prydatnaści;
- parušeńni paradku arhanizacyi akazańnia nieadkładnaj dapamohi;
- hrubyja parušeńni praviadzieńnia ekśpiertyzy časovaj niepracazdolnaści (vyjaŭlena 89 vypadkaŭ nieabhruntavanaj vydačy i praciahnieńnia listkoŭ niepracazdolnaści);
- parušeńni ŭ arhanizacyi praviadzieńnia miedycynskaj dapamohi dzieciam;
- šmatlikija parušeńni zakanadaŭstva ŭ halinie zachavańnia sanitarna-epidemičnych normaŭ.
«Klinika A1»:
- vykarystańnie miedabstalavańnia biez damovy na jaho techničnaje absłuhoŭvańnie i ramont;
- adsutnaść sanitarnaha pašparta na łaziernuju sistemu;
- šmatlikija parušeńni zakanadaŭstva ab sanitarna-epidemičnych normach;
- parušeńni pry akazańni pacyjentam miedpasłuh;
- niajakasnaje viadzieńnie dakumientacyi;
- adsutnaść atrymańnia zhody pacyjentaŭ na praviadzieńnie ŭmiašalnictvaŭ;
- parušeńnie paradku praviadzieńnia miedycynskich ahladaŭ u častcy: afarmleńnia dziońnikavych zapisaŭ, ustanaŭleńnia klinika-funkcyjanalnaha dyjahnazu;
- parušeńni kliničnych pratakołaŭ dyjahnostyki i lačeńnia pacyjentaŭ.
Inšyja padrabiaznaści hetaj spravy pakul nieviadomyja.
Nahadajem, što «Łade» — samy bujny pryvatny miedcentr u Biełarusi. Sioleta jamu spaŭniajecca 30 hadoŭ.
Jak praviła, takija vialikija struktury nie pazbaŭlajuć licenzij biez palityčnych matyvaŭ.
Chto viedaje sapraŭdnyja pryčyny spynieńnia dziejnaści «Łade» i «Kliniki A1», maje bolš infarmacyi pra situacyju, pracuje ŭ klinikach, pišycie ŭ naš biaśpiečny @Nasa_Niva_Bot.
Kamientary