Strałkoŭ-Hirkin: Praciŭnik abaraniajecca piśmienna, uparta i vałodaje stanoviščam
Były ministr abarony tak zvanaj «DNR» Ihar Strałkoŭ-Hirkin u svaim błohu raspavioŭ pra toje, što ciapier adbyvajecca na Danieckim froncie.
Na poŭdni ad Iziuma, piša Hirkin, praciahvajucca žorstkija bai pa ŭsim pierymietry rasijskaha płacdarma. Usiudy jość taktyčnyja prasoŭvańni. Najbolš žorstkija bai iduć na pravym fłanhu — u rajonie pasiołka Vialikaja Kamyšuvacha (i, mahčyma, niepasredna ŭ pasiołku), a taksama ŭ rajonie (mahčyma, i na terytoryi) siała Novaja Dźmitraŭka.
Paśla ŭziaćcia nazvanaha nasielenaha punkta rasijskija vojski padyduć niepasredna da trasy Barvinkava—Słaviansk i stvorać pahrozu jaje pierachopu. Strałkoŭ piša, što zrabić heta budzie niaprosta, bo nasielenyja punkty stajać tam vielmi ščylna, «źlivajucca ŭ amal bieśpieraryŭnuju ahłamieracyju».
Pa słovach Strałkova, bai nosiać bieśpierapynny «hlejki» charaktar.
«U praciŭnika dastatkova žyvoj siły, kab, niahledziačy na padaŭžeńnie linii frontu na hetym učastku, nidzie nie dazvolić rasijskim vojskam ździejśnić hłybokija praryvy».
Strałkoŭ miarkuje, što ŭkrainskija vojski siońnia-zaŭtra pakinuć Liman i vyvieduć svaje vojski na ŭzmacnieńnie fłanhaŭ hrupoŭki — pad Barvinkava i Słaviansk.
«Pieraškodzić hetamu i akružyć častki praciŭnika US RF … vyjavilisia niazdolnyja», — kanstatuje Strałkoŭ.
Ën piša, što ŭkrainskaja armija «abaraniajecca piśmienna, uparta, vałodaje abstanoŭkaj i svaimi vojskami. Nijakaj paniki ŭ šerahach VSU nie nazirajecca. Całkam jasna, što staŭka kamandavańnia zroblena na vyjhryš času i naniasieńnie ŭdarnym častkam US RF maksimalnych strat ‒ za košt marudnaj zdačy terytoryj».
Napieradzie ŭ rasijskich vojskaŭ na hetym kirunku — «vielizarnaja i zahadzia padrychtavanaja da praciahłaj abarony Słavianska-Kramatorskaj ahłamieracyi».
«Jaje VSU całkam dakładna zdavać nie buduć da apošniaj mahčymaści, abaraniajučy, kali spatrebicca, u jakaści «abłožanaj krepaści». Zrešty, hetuju «krepaść» jašče treba budzie akružyć, što vielmi niaprosta zrabić najaŭnymi abmiežavanymi siłami i takimi nizkimi tempami, pry jakich praciŭnik svabodna advodzić svaje častki i zahadzia rychtuje novyja vuzły abarony», — piša Strałkoŭ.
«Paŭdniovaja častka klaščoŭ» zabuksavała, — robić vysnovu sieparatyst. U Zaparožskaj vobłaści prasoŭvańnie rasijskich vojskaŭ amal spyniłasia.
Na centralnym učastku — pad Danieckam — situacyja, pavodle jaho, bieź źmienaŭ. Bai iduć tolki na poŭnačy ad Aŭdziejeŭki, dzie «va US DNR jość niaznačnyja taktyčnyja pośpiechi».
Ahulny vyvad, piša Strałkoŭ, «na žal, biazradasny»: nastup rasijskaj hrupoŭki na akružeńnie Danieckaj hrupoŭki USU sustreŭ žorstkaje supraciŭleńnie i «ŭžo praktyčna dakładna da poŭnaha atačeńnia i razhromu voraha nie pryviadzie».
«U lepšym vypadku, praciŭnik na praciahu mnohich tydniaŭ i navat, nie vyklučana, niekalkich miesiacaŭ budzie pavolna i ź vialikimi stratami (uzajemnymi, viadoma) «vyciskacca» z Danbasa. Što dazvolić jamu biez asablivaj śpieški da leta stvaryć, navučyć i masiravana ŭvieści ŭ boj na lubym abranym učastku stratehičnyja reziervy», — piša Strałkoŭ.
«Z roty zastałosia niekalki čałaviek». Bajec «ŁNR» z žorstkaj ščyraściu apisaŭ bai za Rubiežnaje
Vynieśli prysud Palinie Zyl — błohiercy, jakaja stała nulavym pacyjentam spravy Hajuna, bo ŭ jaje znajšli tuju samuju spasyłku ad Matolki15
Kamientary