Paśla abrušeńnia ściany kaścioła ŭ Ziembinie na darozie pobač ź im pierakryli ruch. Što budzie dalej sa śviatyniaj
Na minułych vychadnych u Ziembinie ŭ Barysaŭskim rajonie abvaliłasia bakavaja ściana chrama Uźniasieńnia Panny Maryi. Sa słoŭ miascovych uładaŭ, jość niebiaśpieka dalejšaha abvalvańnia reštkaŭ budynka.
Čamu ściana abvaliłasia i jaki dalejšy los staražytnaha budynka, vyśviatlała «Minskaja praŭda».
Pa słovach miascovych žycharoŭ, pravaja ściana kaścioła razam z častkaj frantona abvaliłasia ŭ pramiežku z adzinaccaci viečara da hadziny nočy. Kažuć, što pry hetym nichto nie paciarpieŭ.
Pryčynaj mahli stać ciažkahruzy, jakija prajazdžajuć mima hetaha kaścioła. A z prychodam ciopłych dzion ziamla pačała adtavać, i ŭ ścianie Kaścioła stali bačnyja nievialikija raskoliny.
Paśla abrušeńnia ściany kaścioła Uźniasieńnia Panny Maryi terytoryju vakoł adrazu ž aharadzili. Pa słovach staršaha inśpiektara pa ahitacyi i prapahandzie adździeła DAI Barysaŭskaha RUUS Iryny Pachtusavaj, z momantu zdareńnia na aŭtadarozie R-3 Łahojsk — Ziembin — Hłybokaje pierakryli ruch.
Pryčyna — mahčymaje abvalvańnie ściany. Na hetym učastku darohi pracujuć supracoŭniki DAI i MNS. Arhanizavali abjaznuju darohu.
Miascovyja žychary kažuć, što ŭ niadzielu pryjazdžaŭ ksiondz. Jon skazaŭ, što praz paru dzion franton kaścioła buduć valić unutr, kab jon sam nie pavaliŭsia vonki. Bo na druhim baku darohi znachodzicca žyły dom.
Pa słovach staršyni Ziembinskaha sielvykankama Ludmiły Haradničuk, užo źviazalisia ź Ministerstvam kultury i ciapier čakajuć pradstaŭnika hetaha viedamstva:
— Kaścioł Ušeścia Dzievy Maryi uklučany ŭ Dziaržaŭny śpis historyka-kulturnych kaštoŭnaściaŭ Respubliki Biełaruś, 1809 hoda pabudovy. Jaho razburać nielha. Ale i miery pa biaśpiecy treba pryniać. Pašancavała z nadvorjem, ale, kali budzie mocny viecier, ściana moža kančatkova abrynucca, bo raskoliny nazirajucca surjoznyja. Rajonny adździeł pa nadzvyčajnych situacyjach pravodzić naradu. Tamu čakajem rašeńnia Ministerstva kultury i HRANS.
Na hety momant vystaŭlenaje ačapleńnie, i ŭsio pierakrytaje.
Ludmiła Haradničuk padkreślivaje, što miascovyja ŭłady biez dazvołu Ministerstva kultury nie mohuć što-niebudź rabić, akramia jak achoŭvać kaścioł i dobraŭparadkoŭvać terytoryju.
− Tamu my tolki padtrymlivali paradak na katalickich mohiłkach, jakija znachodzicca pobač z kaściołam. Pry dobraŭparadkavańni vulicy, na jakoj staić kaścioł, byŭ pastaŭleny płot. U prajomach kaścioła pastavili dźviery, kab unutr nichto nie zabiraŭsia.
Kaścioł u Ziembinie — heta apošni abjekt epochi baroka, pabudavany na terytoryi Biełarusi. U 1812 hodzie tut adpačyvaŭ Napaleon, pierapraviŭšysia praź Biarezinu. Budynak, jaki pieražyŭ usie vojny, nie zmoh vystajać u paślavajenny čas. U 2010 hodzie ruiny kaścioła źbiralisia źnieści. Upraŭleńnie kapitalnaha budaŭnictva Barysaŭskaha rajvykankama praviało abśledavańnie budynka i vyniesła jamu prysud − znos. Takoje rašeńnie było vyniesienaje, niahledziačy na status kaścioła, jak pomnika architektury. Tady za spravu ŭziałosia Tavarystva achovy pomnikaŭ historyi i kultury i znos udałosia praduchilić.
Ciapier čytajuć
35‑hadovy dalnabojščyk ź Biełarusi raptoŭna pamior u Kitai. Heta muž samaj tytułavanaj biełaruskaj dziudaistki1
Kamientary