Načalnik Hienštaba Biełarusi: Piać BTH stajać na miažy z Ukrainaj, płanujecca ich zamiena na inšyja piać
Načalnik Hienštaba Uzbrojenych sił Biełarusi Viktar Hulevič raskazaŭ pra ratacyju bataljonnych taktyčnych hrup na ŭkrainskaj miažy.
«U ciapierašni čas u adpaviednaści z zadačaj, pastaŭlenaj hałoŭnakamandujučym Uzbrojenymi siłami, piać bataljonnych taktyčnych hrup sumiesna z orhanami pamiežnaj słužby ažyćciaŭlajuć prykryćcio paŭdniovych miežaŭ našaj dziaržavy z metaj niedapuščeńnia praniknieńnia na terytoryju Biełarusi z boku Ukrainy roznych nacyjanalistyčnych uzbrojenych farmavańniaŭ, nielehalnaj dastaŭki zbroi, bojeprypasaŭ i vybuchovych rečyvaŭ.
Hetyja padraździaleńni vykonvajuć zadačy raźviedki, patrulavańnia, achovy abjektaŭ i abarony na darožnych kirunkach. U najbližejšy čas płanujecca ažyćciavić ich zamienu taksama piaćciu bataljonnymi taktyčnymi hrupami», — cytuje načalnika Hienštaba telehram-kanał Minabarony.
Padraździaleńni, jakija vykanali svaje zadačy pa prykryćci dziaržaŭnaj miažy, buduć viernutyja ŭ punkty pastajannaj dysłakacyi i pačnuć płanavuju paŭsiadzionnuju dziejnaść.
Nahadajem, što ŭčora ŭ Maskvie Łukašenka zajaviŭ Pucinu, što Ukraina rychtavała ŭdary pa Biełarusi.
Učora taksama źjaviłasia infarmacyja ad ŭkrainskaha boku, nibyta rasijskija samaloty abstralali biełaruskija pamiežnyja vioski, u Minabarony Biełarusi nazvali heta fejkam i tryźnieńniem, ale žychary Stolinskaha rajona paćvierdzili «Našaj Nivie» fakt vybuchaŭ paśla pralotu samalotaŭ.
Kamientary