Novy fiederalny kancler Hiermanii Ołaf Šolc 15 lutaha ździejniŭ svoj pieršy vizit u Maskvu ŭ hetaj jakaści. Paśla pieramovaŭ z Uładzimiram Pucinym jon spačatku vystupiŭ na sumiesnaj pres-kanfierencyi, a zatym asobna pahutaryŭ z presaj. Deutsche Welle adabrała vosiem znakavych vykazvańniaŭ kiraŭnika niamieckaha ŭrada pa pytańniach mižnarodnaj palityki.
Pra frazu Pucina pra «hienacyd u Danbasie»
«Heta rezkaje słova… ale jano niapravilnaje».
Pra rasijskija vojski na miažy z Ukrainaj
«Nie mahu nie paŭtarać znoŭ i znoŭ, što my vielmi zakłapočanyja tym, da čaho pryviaduć u nabližejšy čas sto tysiač sałdat i ich dziejańni. My nie možam znajści razumnaj pryčyny dla takoha zasiarodžvańnia vojskaŭ. Tamu terminova patrabujecca deeskałacyja».
Pra zaklik Dumy pryznać «DNR» i «ŁNR»
«Kali rezalucyi, jakija pryniaŭ siońnia parłamient, stanuć realnaściu, heta, naturalna, budzie aznačać parušeńnie Minskich damoŭlenaściaŭ… tady praces budzie pierapynieny i skončany, i heta stała b palityčnaj katastrofaj».
Pra pašyreńnie NATA na uschod
«Tut paŭstała davoli svojeasablivaja situacyja, bo jano zusim nie staić na paradku dnia, i ŭsie heta vydatna viedajuć. Heta nie taja tema, ź jakoj nam pryjdziecca mieć spravu na našych pasadach, pakul my na ich znachodzimsia. (Źviartajučysia da Pucina) Ja nie viedaju, jak doŭha prezident źbirajecca zastavacca na svajoj pasadzie, u mianie, va ŭsiakim vypadku, takoje adčuvańnie, što heta moža praciahnucca doŭha, ale nie viečna».
Pra «Miemaryjał»
«Z tryvohaj my nazirajem za tym, jak zvužajecca prastora dla hramadzianskaj supolnaści. Heta asabliva tyčycca tych partnioraŭ, ź jakimi nas źviazvaje daŭniaje i važnaje supracoŭnictva. Tut ja chacieŭ by nazvać hrupu «Miemaryjał». Toje, što jana nie moža ciapier praciahvać svaju dziejnaść, vyklikała ŭ Hiermanii hłybokaje nierazumieńnie. Bo heta mienavita taja arhanizacyja, jakaja, u pryvatnaści, ŭniesła asnoŭny ŭkład u vyśviatleńnie losu savieckich prymusovych rabočych u nacysckaj Hiermanii. My spadziajemsia, što ŭ hetym pytańni mahčymaja stanoŭčaja pierśpiektyva».
Pra Hiercharda Šrodera
«Ja nie chaču kamientavać pryvatnapradprymalnickuju dziejnaść byłoha palityka. Jon havoryć nie ad imia Fiederatyŭnaj Respubliki Hiermanija, a ad svajho imia».
Pra Alaksieja Navalnaha
«Što tyčycca spadara Navalnaha, to ŭ mianie vyraznaja pazicyja: vyniesieny jamu prysud niesumiaščalny z pryncypami pravavoj dziaržavy. I ja hetuju pazicyju ŭžo nieadnarazova vykładaŭ u roznych situacyjach».
Pra situacyju z Russia Today u Hiermanii
«Isnuje pravavaja pracedura, padčas jakoj možna padavać zajaŭki (na atrymańnie licenzii na viaščańnie ŭ FRH), u tym liku i tyja, jakija jašče nie byli padadzienyja. Potym jany apracoŭvajucca ŭ ramkach dziejnych Praviłaŭ adpaviednymi viedamstvami. Heta adbyvajecca ŭ ramkach najaŭnych zakonaŭ, na jakija ŭsie ŭ roŭnaj miery mohuć pakłaścisia».
Čytajcie taksama:
Kancler Niamieččyny: U vypadku ahresii suprać Ukrainy Rasiju čakajuć vielmi žorstkija sankcyi
Kancler Hiermanii Šolc: Rasija pavinna pryznać, što siła ŭ praŭdzie
Ciapier čytajuć
«Strelba kali i strelić, to naŭrad ci kulamiotnaj čarhoj». Maksim Znak acaniŭ realnaść pahroz biełaruskaj prapahandy pazbavić hramadzianstva palitemihrantaŭ1010
Kamientary