Śpiavačka Marharyta Laŭčuk paviedamiła ŭ Instagram, što jaje abviaścili ŭ vyšuk jak abvinavačanuju pa spravie pra «ździek ź dziaržaŭnych simvałaŭ». Taksama ŭ vyšuk trapiŭ jaje partnior pa duecie «Krasnaja zieleń», błohier Andrej Pavuk.
Pra toje, što ŭ Biełarusi raspačali kryminalnuju spravu suprać Pavuka, stała viadoma ŭ kancy 2021-ha. Artykuł — «za publičnuju abrazu pradstaŭnika ŭłady ŭ suviazi z vykanańniem im słužbovych abaviazkaŭ». Sprava suprać Laŭčuk była zaviedzienaja ŭ červieni 2021 hoda za «abraźlivyja i bluźnierskija dziejańni ŭ dačynieńni da dziaržaŭnaj simvoliki».
Andrej Pavuk i Marharyta Laŭčuk znachodziacca za miažoj jašče z 2020 hoda. Andrej rehularna telefanuje siłavikam i čynoŭnikam u Biełaruś i zadaje im niazručnyja pytańni (zapisy razmoŭ vykładaje ŭ internet).
A razam Laŭčuk i Pavuk jak hurt «Krasnaja zieleń» zapisali šmatlikija humarystyčnyja kampazicyi.
Kamientary