Udzielnik aŭtaprabiehaŭ i muž praŭładnaj błohierki. Što za novyja prapahandysty źjavilisia na BT?
Na BT źjavilisia novyja viadučyja. Prapahandysty ad naroda nazyvajuć ukraincaŭ na Majdanie kastrulahałovymi i raskazvajuć, jak biedna žyvuć u Polščy. Chto hetyja ludzi? Niekatorych z hetych telepiersanažaŭ vy mahli ŭžo bačyć.
«U režymie praŭdy» — tak nazvali prajekt, jaki zapuścili pad kryłom tavarystva «Viedy», jakoje ŭznačalvaje Hihin. Spačatku navaśpiečanyja ekśpierty jeździli z majstar-kłasami pa krainie. Jany heta nazvali narodnaj adukacyjnaj prahramaj — nibyta razburali fejki. Ale da «jarkich śpikieraŭ» (jak zajaŭlena było ŭ afišach) skieptyčna staviacca navat prychilniki Łukašenki. «Chto heta?» — žartavali ź ich u sacsietkach.
U kancy śniežnia śpikiery z adnajmiennaj prahramaj pryjšli na BT. Chto jany?
Pradprymalnik Stanisłaŭ Jaskievič — daŭni siabra paraalimpijca Alaksieja Tałaja.
Jaskieviču 41 hod. Jon byŭ pastajannym udzielnikam praŭładnych aŭtaprabiehaŭ. Jeździŭ u pieršych šerahach u mašynie sa ściaham. Raskazvaŭ, što padletki pakazvali im nieprystojnyja žesty. A dahetul pikietavaŭ polskuju ambasadu z płakatam «Spynicie interviencyju».
«Usie pamiatajuć radaść ad sustrečy ŭ siecivie rodnaj ČZ-avatarki, ščyruju ŭśmiešku ad ściažka ci hieorhijeŭskaj stužki na aŭto», — nastalhiravaŭ jon pa padziejach 2020-ha.
Jak pradprymalnik jon zajmajecca prasoŭvańniem tavaraŭ.
«Ja ź dziacinstva byŭ aktyŭny i niešta pradprymaŭ. Mnie daviałosia raści faktyčna samomu: mama była surjozna chvoraja, baćka mnoj nie zajmaŭsia», — raskazvaŭ jon «SB».
Paśla vybaraŭ Jaskievič pazicyjanuje siabie błohieram. Letaś udzielničaŭ navat u treninhu Minabarony «Hulni błohieraŭ» — biehaŭ u bronikamizelcy i vajennaj formie, hulaŭsia ŭ ekstremalnuju žurnalistyku, zachoplena zdymajučy siabie na telefon.
Inšy navaśpiečany viadoŭca — biznesoŭca Alaksandr Chomič. U sacsietkach jon chvaliŭsia, što naviedvaŭ majstar-kłasy «Biznes maładości» — hetyja rasijskija treninhi nazyvajuć zvyčajnym razvodam.
Zrešty, z ulikam taho, što žyvie jon u katedžy ŭ Łahojskim rajonie i razam ź siamjoj jeździć adpačyvać na harnałyžnyja kurorty ŭ Sočy, niadrenna zarablać atrymlivajecca.
Žonka biznesoŭca — praŭładnaja błohierka Julija Chomič, jakaja taksama ciapier viadučaja BT. Joj 35, jana z Tałačyna, skončyła Akademiju kiravańnia, juryst pa śpiecyjalnaści.
Raniej pracavała ryełtaram, a paśla syšła ŭ dekret. Z mužam jana na pracy i paznajomiłasia — jon kuplaŭ učastak pad dom i pazvaniŭ u ahienctva, dzie pracavała Chomič. Ciapier siamja žyvie na tym učastku.
Julija ŭdzielničała ŭ konkursie pryhažości Top of the World u 2017 hodzie, dzie stała pieršaj vice-misis. U intervju jana časta padkreślivaje, što vusny ŭ jaje svaje.
Čym zapomniłasia Chomič? Na mitynhu ŭ padtrymku Łukašenki adrazu paśla vybaraŭ, jana hučna skandavała «Za baćku!». Paśla skardziłasia, što ŭ sałonie joj admovilisia rabić manikiur praź jaje palityčnyja pohlady. «Heta sapraŭdny fašyzm», — aburałasia jana.
Letaś u studzieni paśla chakiejnaha matča jana vybiehła na lod, kab pacałavać Łukašenku. A potym padčas «Vialikaj razmovy» aktyŭna abaraniała jaho ad niazručnych pytańniaŭ žurnalistaŭ BBC i CNN.
Apošni «pasłańnik praŭdy» ŭ hetaj čaćviorcy — błohier i muzyka Cimur Prachin. «Naša Niva» raniej užo pisała pra jaho, ale mahčyma, vy nie paznali jaho biez vusaŭ.
Aŭtar patryjatyčna-maralnych piesień, zajmajecca śpiektaklami dla dziaciej. Prachin uznačalvaŭ łukašenkaŭskija šeści. Raskazvaŭ, što mama jaho ŭ palityčnych pohladach padtrymlivaje, a voś z žonkaj praz heta razyšoŭsia.
Čytajcie taksama:
Z kryžam, ściaham i z vusami. Raskazvajem, što za trojca ŭznačalvaje łukašenkaŭskija šeści
Chto takaja Ksienija Lebiedzieva, jakaja aśviatlaje žanočyja maršy dla BT
-
Šlacham Cichanoŭskaha: redaktarka rajonki i łukašenkaŭski błohier tak zachapilisia prablemami Barysava, što pryjšli da kramolnych vysnovaŭ
-
Dzie ciapier Kirył Kazakoŭ — były kiraŭnik STB, «chrosny baćka» Azaronka i inšych prapahandystaŭ?
-
Biełaruskamoŭny dziciačy časopis «Matulina soniejka» prypyniŭ svoj vychad
Ciapier čytajuć
Ciemnaskury student u Minsku paskardziŭsia Łukašenku na darahuju koka-kołu. Užo vybačaŭsia, ale milicyja im zacikaviłasia6
Kamientary