Maskoŭski haradski sud pryniaŭ rašeńnie ab likvidacyi pravaabarončaha centra «Miemaryjał». Z adpaviednaj prośbaj u sud źviarnułasia Maskoŭskaja prakuratura.
Padčas sprečak prakuror zajaviŭ, što pravaabarončy centr «ažyćciaŭlaje svaju finansavuju dziejnaść nieprazrysta». Pradstaŭnik viedamstva taksama adznačyŭ, što, na dumku Hienprakuratury, «Miemaryjał» demanstruje «ŭstojlivaje hrebavańnie Kanstytucyjaj Rasii i zakonami».
Viarchoŭny sud 28 śniežnia pryniaŭ rašeńnie ab likvidacyi «Mižnarodnaha Miemaryjała» pa anałahičnym isku Hienprakuratury. Pradstaŭniki «Miemaryjała» zajavili, što abskardziać rašeńnie, i padkreślili, što znojduć zakonnyja sposaby dla praciahu pracy, paviedamlaje meduza.io.
U padtrymku «Miemaryjała», što dziejničaŭ bolš za 30 hadoŭ, vystupali dziasiatki rasijskich i mižnarodnych arhanizacyj, palitykaŭ, dziejačaŭ navuki i kultury. Siarod ich — łaŭreaty Nobieleŭskaj premii miru, hałoŭny redaktar «Novaj haziety» Dźmitryj Murataŭ i pieršy prezident SSSR Michaił Harbačoŭ.
***
«Miemaryjał» byŭ stvorany ŭ 1987 hodzie adnadumcami, jakija chacieli ŭviekaviečyć pamiać achviaraŭ palityčnych represij savieckaj epochi.
Siabry ruchu zajmalisia zboram podpisaŭ dla stvareńnia pomnika i miemaryjalnaha kompleksu achviaram represij, pravodzili vuličnyja demanstracyi, vystavy i navukovyja sieminary pa temie dziaržaŭnaha teroru.
Pieršym staršynioj rady «Miemaryjała» staŭ akademik, łaŭreat Nobieleŭskaj premii miru Andrej Sacharaŭ.
«Miemaryjał» vydaje knihi pra historyju represij, sprabuje damahčysia pastajannaha dostupu da archivaŭ.
Paralelna z pracaj nad zboram infarmacyi ab represavanych «Miemaryjał» staŭ zajmacca pravaabarončaj dziejnaściu, u liku inšaha — pieralikam i padtrymkaj palityčnych źniavolenych u Rasii.
Ciapier čytajuć
Na poŭnačy Biełarusi isnavała vielizarnaje voziera — u 150 razoŭ bolšaje za Narač. Jano źnikła ŭ vyniku pryrodnaj katastrofy, ale ślady zaŭvažnyja i siońnia77
Kamientary