Palitźniavolenaha studenta asudzili da 4 hadoŭ kałonii za administravańnie telehram-kanała «Biełyja chałaty»
U Minskim haradskim sudzie 15 listapada da čatyroch hadoŭ kałonii ahulnaha režymu asudzili 21-hadovaha palitviaźnia studenta 4-ha kursa Biełaruskaha dziaržaŭnaha miedycynskaha ŭniviersiteta Uładzisłava Marcinoviča, jakoha amal hod utrymlivajuć pad vartaj u SIZA-1. Jaho abvinavacili pa č. 3 art. 361 Kryminalnaha kodeksa (zakliki da dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś) šlacham administravańnia telegram-kanała «Biełyja chałaty», paviedamlajuć pravaabaroncy.
Spravu razhladała sudździa Alena Ananič, dziaržabvinavačańnie padtrymlivaŭ Alaksandr Ramanovič.
Studenta zatrymali 19 listapada — u toj dzień taksama zatrymali žurnalistku Kaciarynu Barysievič i lekara Arcioma Sarokina, jakich asudzili ŭ dalejšym za vydavańnie miedycynskich dakumientaŭ zabitaha žychara «płoščy pieramienaŭ» Ramana Bandarenki. Uładzisłaŭ Marcinovič amal hod utrymlivajecca ŭ SIZA-1 u Minsku.
Sud nad Marcinovičam raspačaŭsia 15 lipienia, jon tady nie pryznaŭ vinu i skazaŭ na sudzie:
«Spačatku havorycca ab stvareńni kanała, potym ab raspaŭsiudzie. Chaciełasia b viedać, mnie stavicca ŭsio heta ŭ sukupnaści: i raspaŭsiudžvańnie, i stvareńnie, i publikacyja? Ci źjaŭlajecca stvareńnie i viadzieńnie kanała złačynstvam? Ci sapraŭdy kožny post źmiaščaje zakliki i škodu?»
27 kastryčnika sud pa spravie adnaviŭsia. Na im Uładzisłaŭ Marcinovič pryznaŭ vinu. Jak stała viadoma na sudzie, chadajnictva ab poŭnym pryznańni viny i raskajvańni jon nakiravaŭ u Minski haradski sud ź SIZA 9 vieraśnia. Pavodle hetaha chadajnictva, na Marcinoviča paŭpłyvała toje, što jon prabyŭ amal hod u SIZA.
10 listapada Uładzisłaŭ Marcinovič vystupiŭ z apošnim słovam, jakoje doŭžyłasia paŭtary hadziny. Vialikuju častku času jon raspaviadaŭ pra niestykoŭki ŭ spravie.
«Pazbaŭleńnie voli źjaŭlajecca dla mianie niekatorym pieraškodaj dla navučańnia i zasvajeńnia materyjału. Biezumoŭna, heta daje, viadoma, inšy dośvied, ale, pravioŭšy hod u SIZA, mahu skazać, što, napeŭna, lepš by ja z hetym dośviedam nie sutykaŭsia. Ale, tym nie mienš, jon byŭ mnoju atrymany. Spadziajusia, nie zanadta adabjecca ŭ dalejšym, maje blizkija nie buduć mnie kazać, što ja vielmi mocna źmianiŭsia paśla turmy. Nu, pahladzim».
Padčas apošniaha słova palitviazień padzialiŭsia svaimi płanami na budučyniu:
«Skončyć miedunivier, narešcie stać lekaram i lačyć ludziej, praciahnuć zajmacca navukova-daśledčaj dziejnaściu, raźvivać ličbavuju miedycynu i elektronnuju achovu zdaroŭja, nadać uvahu pytańniam telemiedycyny, praciahnuć pracavać u płanie intehracyi tych pracesaŭ, jakija dyktuje novy infarmacyjny viek».
Ja staŭlu svajoj metaj, i ŭ vypadku luboha rašeńnia pa dadzienaj kryminalnaj spravie ja nie pazbaŭlu siabie šlachu da hetaj mety <…> patraču ŭsie svaje siły i rašučaść na toje, kab naša cyvilizacyja paśpiachova dasiahnuła prahresu ŭ maralnym, technałahičnym i intelektualnym raźvićci».
U vyniku, 15 listapada sudździa Alena Ananič pryznačyła Uładzisłavu Marcinoviču mienavita takoje pakarańnie, jakoje prasiŭ prakuror: čatyry hady kałonii va ŭmovach ahulnaha režymu.
«U pašparcie babuli staić data naradžeńnia 00.00.1945» — «A ŭ majoj XX.XX.1940». Jak takoje moža być?2
Kamientary