Łukašenka zajaviŭ, što Ziankovič i Fiaduta rychtavali zamach na jaho
Siońnia padčas naviedvańnia Škłoŭskaha rajona Łukašenka zajaviŭ, što na jaho rychtavała zamach FBR ci CRU.
«U płanach — zachop dziciaci, adnaho, druhoha, jak atrymajecca… «Pasadzim u pohrab»… Darečy, u Homielskaj vobłaści i pohrab padrychtavali. My zatrymali hrupu. Jany nas pryviali, pakazali, jak heta ŭsio płanavali. Ja maŭčaŭ. Zatym my vyjavili pracu vidavočna zamiežnych śpiecsłužbaŭ — chutčej za ŭsio, CRU, FBR, nie viedaju, chto tam z amierykancaŭ pracavaŭ. My vyjavili ich žadańnie prybyć u Minsk i zaniacca arhanizacyjaj zamachu na prezidenta i dziaciej.
Pavodle jaho słoŭ, Minsk pa adpaviednych kanałach papiaredziŭ pra heta Maskvu, «kab byli ŭ temie».
— Nie daj Boh, adkaz budzie samym žorstkim. Ich zachapili ŭ Maskvie. Z ZŠA prylacieła ahientura, niejki Ziankovič. My ich adsočvali, nazirali. Jany bajalisia siudy jechać paśla taho, jak my zatrymali niekalki hrup, jakija zbroju ŭžo siudy źvieźli, u schovanki schavali. A jany źjechali ŭ Maskvu. Chto ž tam byŭ jašče? Naš ža tam hety byŭ… Fiaduta. Potym stali šyrej hladzieć, Kastusioŭ źjaviŭsia. U mienšaj stupieni, jon u Maskvie nie byŭ, my vyjšli na jaho tut. I šerah inšych…. Vysłali hrupu zachopu ŭ Maskvu, 10-12 čałaviek.
«Žyvyja ludzi, zapisali ŭsio, aŭdyjo, videa. Nie daj Boh, jany dakranucca da maich dziaciej, jakija naohuł nie majuć dačynieńnia da hetaha. Nie daj Boh nie tolki da maich, ale i da vašych, heta budzie strašnaja raźnia. Ale mianie ździŭlaje inšaje: čamu amierykancy siabie tak pavodziać? Bo pastavić zadaču likvidavać prezidenta, zapomnicie, nie moža dać nichto, akramia najvyšejšaha palityčnaha kiraŭnictva. Tolki jany, nijakija śpiecsłužby, tolki jany», — skazaŭ Łukašenka.
Siužet byŭ pakazany na telekanale ANT.
Zatym ANT pakazaŭ kadry zachopu Jurasia Ziankoviča i Alaksandra Fiaduty, śćviardžajučy, što spyniena dziejnaść terarystyčnaj hrupy, jakaja źbirałasia zajmacca fizičnaj likvidacyjaj Łukašenki i členaŭ jaho siamji. Siužet prakamientavaŭ kiraŭnik KDB Ivan Cierciel.
«Kamitetam dziaržaŭnaj biaśpieki paśpiachova zavieršanaja šmatstupiennaja śpiecyjalnaja apieracyja, u vyniku jakoj na ŭsich etapach zadakumientavanaja i spynienaja dziejnaść arhanizavanaj hrupy terarystyčnaj nakiravanaści», — raspavioŭ Ivan Cierciel.
Pakazali videa sa słovami Fiaduty (u videazvanku ŭdzielničali taksama Ihar Makar, Juraś Ziankovič, Ryhor Kastusioŭ, doktar Dźmitryj Ščyhielski, Alaksandr Pierapiečka, Pavieł Kułažanka), dzie toj pryvodziŭ prykład likvidacyi ŭ 1981 hodzie prezidenta Jehipta Anvara Sadata [jaho rasstralali vajskoŭcy padčas paradu], ale prapanavaŭ nie havaryć pra heta, a pahuhlić u vikipiedyi.
Paviedamlajecca, što pieravarot nibyta byŭ pryznačany na červień-lipień. Dokaznaja baza, jakaja źjaviłasia ŭ efiry ANT, — razmovy ŭ zumie Fiaduty, Ziankoviča i jašče piaciarych čałaviek. Nijakich zhadak zbroi ci kankretnych śviedčańniaŭ padrychtoŭki «miaciažu» nie prahučała.
Ryhor Kastusioŭ byŭ zatrymany ŭviečary 12 krasavika ŭ Škłovie.
U toj ža dzień pierastaŭ vychodzić na suviaź palitołah Alaksandr Fiaduta, jaki znachodziŭsia ŭ Maskvie. Na nastupny dzień stała viadoma pra jaho zatrymańnie, a taksama pra zatrymańnie jurysta Juryja Ziankoviča ŭ Maskvie (jon hramadzianin ZŠA i žyvie tam, ale byŭ u stalicy Rasii pa spravach biznesu). Pa słovach jahonaj žonki, jaho litaralna vykrali z hatela.
13 krasavika ŭ KDB paviedamili pra zatrymańnie Kastusiova i Fiaduty pa «niepasredna ŭźnikłym padazreńni ŭ ździajśnieńni złačynstva».
Ciapier čytajuć
«Hubazikaŭcy schilajuć Kaleśnikavu da vysyłki, ale jana nie choča»1
Kamientary