Kalarovyja futry, safary, narodny kaścium. 10 trendaŭ ź Biełaruskaha tydnia mody
3 i 4 krasavika ŭ Minsku paśla pierapynku ŭ hod prajšoŭ tydzień mody. Letaś praz epidemiju i palityčnuju situacyju ŭ krainie pakazy byli niemahčymyja. Sioleta za novymi kalekcyjami modniki sačyli anłajn. «Naša Nina» vyłučyła asnoŭnyja trendy ad ajčynnych dyzajnieraŭ.
Zvyčajna viasnoj prezientujuć adzieńnie na vosień-zimu, ale na biełaruskim tydni adyšli ad hetych umoŭnaściaŭ i pakazali kalekcyi na ciapierašni i nastupny siezon.
Safary
Styl adzieńnia palaŭničych i archieołahaŭ daŭno palubiŭsia modnicam za jaho zručnaść i ŭniviersalnaść. Dadać atłasnuju chustku ci tufli-łodački — i atrymajecie elehantny vobraz, kiedy i panamu — kežuał-varyjant. Kłasičnaje safary maje na ŭvazie piasočny koler, ale dyzajniery prapanujuć taksama novaje pračytańnie — u błakicie.
Pastel
Piaščotna-ružovy, piersikavy, małočna-błakitny… Kali chočacca, kab viasna z kvitniejučymi sadami zaŭsiody była z taboj, vy viedajecie, što abrać.
Transfarmacyja biełaruskaha kaściumu
Biełaruski stroj — heta nie tolki vyšyvanki. Heta jašče i asablivy kroj i praporcyi. Brend LSD Clothing, viadomy stylovymi kasuchami z eka-skury, pradstaviŭ svajo bačańnie kulturnaha kodu. «Rupliva vyvučyŭšy archivy, ja akuratna preparyravała kaścium, pierasabraŭšy jaho ŭ sučasnym klučy. Andarak, kašula, fartuch pieranieślisia ŭ XXI stahodździe i znajšli novaje žyćcio ŭ aktualnych siłuetach i tkaninach», — tłumačyć zadumu kreatyŭny dyrektar brenda Darja Lebiedzieva.
Pečvark
Trend na łapikavaje šyćcio praročać i suśvietnyja podyumy — jarkija madeli milhali, naprykład, na pakazie Chloé ŭ Paryžy. Pryčyn takoj uvahi da rukadziella moža być niekalki: heta i imknieńnie da ekałahičnaj vytvorčaści, i žadańnie raznastaić budzionny harderob niestandartnaj i ekskluziŭnaj rečču.
Vysokaje mastactva
Hałoŭnaj karcinaj minułaha hoda stała «Jeva» Chaima Sucina. Rabić adsyłki da jaje ciapier — palityčnaje vykazvańnie. Dyj chvala syšła. Tamu dyzajniery natchnialisia inšymi tvorami. Reniesans, ar-deko, suprematyzm — pachod u takim ubory ŭ muziej ci kulturnuju imprezu nibyta niamakaje, što vy ŭ kantekście.
Raślinny prynt
Biez sukienak u kvietki nie abychodzicca nivodny siezon viasna-leta. Aproč pryntu, źviarnicie ŭvahu na abjomnyja rukavy — jašče adna tendencyja, jakaja palubiłasia dyzajnieram i hučna viarnułasia ŭ modu.
Kalarovyja futry
Uzimku biełarusy zvyčajna pierachodziać na ciomnyja kolery. Ale ŭ nastupnym chałodnym siezonie dyzajniery prapanujuć pierahledzieć hety padychod i addać pieravahu jarkaj hamie. Zastacca niezaŭvažnym u takim futry niemahčyma, tamu pierš čym apranuć jaho, sačycie za navinami.
Nieonavyja kolery
Dla tych, chto choča adčuć siabie hierainiaj multfilma i sumuje pa pazityŭnych emocyjach, natchnieńniem stanie kalekcyja Maryny Davydavaj. Kali niama nastroju — stvaraj jaho sam.
Sukienka dla rusałki
Kali i być karalevaj, to marskoj. Bliskaŭki, pierłamutr, łuska… Dyzajnier Tamara Harydaviec pakazała, što sierabrystyja sukienki mohuć sabie dazvolić nie tolki dziaŭčaty, ale i kabiety ŭ pavažnym uzroście.
Plecienyja torby
Varyjant dla rassłablenaha špacyru pa horadzie ci kurortnym uźbiarežžy. Možna spałučać jak ź lohkimi pastaralnymi sukienkami, tak i z džynsami.
Ciapier čytajuć
Biełaruski psichijatr: Palihraf z 100 chłusaŭ nie vyjavić dvuch. A siemiarych tych, chto kaža praŭdu, abvinavacić u chłuśni — i heta pa aptymistyčnych acenkach1111
Biełaruski psichijatr: Palihraf z 100 chłusaŭ nie vyjavić dvuch. A siemiarych tych, chto kaža praŭdu, abvinavacić u chłuśni — i heta pa aptymistyčnych acenkach11
Źnikły Anatol Kotaŭ byŭ partnioram samaha vysokapastaŭlenaha biełaruskaha raźviedčyka, jaki pierajechaŭ u Polšču. Tut moža być kluč da razhadki jaho źniknieńnia7777
Kamientary