«My siońnia žyviom va ŭmovach infarmacyjnaj vajny»: deputaty prymajuć papraŭki ŭ zakon da ŚMI
Deputaty Pałaty pradstaŭnikoŭ pryniali ŭ pieršym čytańni zakonaprajekt ab źmianieńni zakonaŭ pa pytańniach ŚMI.
Pradstaviŭ jaho ministr infarmacyi Ihar Łucki. Jon adznačyŭ važnaść internetu ŭ ciapierašni čas, piša BiełTA.
«Pry hetym daloka nie zaŭsiody infarmacyja, jakaja raspaŭsiudžvajecca ŭ internecie, słužyć raźvićciu hramadstva i dziaržavy. Internet staŭ instrumientam infarmacyjnych vojnaŭ, nakiravanych na razbureńnie hramadskich asnoŭ i maralnych kaštoŭnaściaŭ, a časam i cełych dziaržaŭ. Mienavita tamu šerah navacyj, jakija źmiaščajucca ŭ zakonaprajekcie, nakiravanyja na rehulavańnie pravaadnosin u internet-prastory», — skazaŭ jon.
U zakonie, u pryvatnaści, prapanujecca ŭdakładnić patrabavańni da zasnavalnika i hałoŭnaha redaktara ŚMI, pašyryć abaviazki dla redakcyi ŚMI i ŭładalnikaŭ internet-resursu. U zakonie kankretyzujucca paŭnamoctvy žurnalista, zamacoŭvajucca padstavy dla pazbaŭleńnia jaho akredytacyi. Taksama vyznačajucca vypadki, kali nievykanańnie abaviazkaŭ žurnalista budzie ličycca hrubym parušeńniem jaho pracoŭnych abaviazkaŭ.
Akramia taho, u zakonie płanujecca pašyryć pieralik zabaronienaj infarmacyi, pryniać miery dla abmiežavańnia zamiežnaha ŭpłyvu na infarmacyjny rynak, skasavaŭšy ciapierašniuju prefierencyju dla redakcyj ŚMI, u čyich statutnych fondach prysutničajuć zamiežnyja inviestycyi, jakija pieravyšajuć 20%.
Siarod inšych abmiežavalnych mieraŭ — pašyrany pieralik padstaŭ dla admovy ŭ dziaržaŭnaj rehistracyi abo pierarehistracyi ŚMI, pryniaćcia rašeńnia ab abmiežavańni dostupu da internet-resursu abo sietkavaha vydańnia. Płanujecca dazvolić hienprakuroru — a taksama prakuroram abłaściej i Minska — začyniać dostup da sajtaŭ, «z dapamohaj jakich raspaŭsiudžvajecca infarmacyja, nakiravanaja na prapahandu ekstremisckaj dziejnaści, i inšaja infarmacyja, zdolnaja nanieści škodu nacyjanalnym intaresam Biełarusi».
Namieśnica staršyni Pastajannaj kamisii pa pravach čałavieka, nacyjanalnych adnosinach i ŚMI Lilija Ananič dadała, što, «pa sutnaści, my siońnia žyviom va ŭmovach infarmacyjnaj vajny. I nieabchodna zadziejničać uvieś arsienał zakanadaŭčaha ŭździejańnia dla zabieśpiačeńnia dziaržaŭnych pryjarytetaŭ u raźvićci nacyjanalnaj infarmacyjnaj prastory».
Ciapier čytajuć
Anžaliku Mielnikavu bačyli ŭ Minsku ŭ «Dana Mole»23
Kamientary