Jakaja vierahodnaść zarazicca karanavirusam na śviežym pavietry?
Čym ciaplej stanovicca na dvare, tym bolšaja spakusa hulać, siadzieć na terasach kaviarań, treniravacca. Adnak nakolki vialikaja vierahodnaść zarazicca karanavirusam na dvare? I ci jość sens nasić masku na vulicy? Voś mierkavańni ekśpiertaŭ.
Ryzyka zarazicca kavidam na śviežym pavietry značna mienšaja, čym u pamiaškańni, piša DW.
Klučavuju rolu ŭ raspaŭsiudžvańni karanavirusa adyhryvajuć aerazoli, drobnyja čaścicy pavietra, jakija mohuć pieramiaščacca na adlehłaść da dvuch mietraŭ. Adnak ekśpierty śćviardžajuć, što na adkrytym pavietry ryzyka zaražeńnia našmat mienšaja.
«Heta źviazana z tym, što cyrkulacyja pavietra na dvare bolšaja dziakujučy vietru», — adznačaje Nika Muters (Nico Mutters), kiraŭnik Instytuta hihijeny i hramadskaj achovy zdaroŭja pry Univiersiteckaj klinicy Bona (Institute for Hygiene and Public Health at Bonn University Hospital).
Viecier nie raspaŭsiudžvaje infiekcyju jašče bolš, a jakraz naadvarot: čym macniejšy viecier, tym chutčej raśsiejvajucca aerazoli, jakija mohuć być nośbitami virusa.
Drobnyja čaścicy, jakija vydychajuć ludzi, našmat chutčej raśsiejvajucca na śviežym pavietry. Adnak vierahodnaść zaražeńnia nielha vyklučać całkam, kali ludzi źbirajucca vialikimi hrupami i nie prytrymlivajucca sacyjalnaj dystancyi.
Tamu zachavańnie biaśpiečnaj dystancyi ad 1,5 da 2 mietraŭ zastajecca pažadanym navat na adkrytym pavietry.
Navukoŭcy śćviardžajuć, što asablivuju ŭvahu treba nadavać dystancyi z tymi, chto zajmajecca sportam. Pry fizičnych nahruzkach dychańnie stanovicca bolš častym i hłybokim, a heta značyć, što vyłučajecca bolš aerazolaŭ. Tamu kantaktnyja vidy sportu na adkrytym pavietry ŭjaŭlajuć saboj niebiaśpieku.
U vypadku, kali niama mahčymaści padtrymlivać dystancyju, varta karystacca maskaj. Asabliva ŭ tych miescach, dzie niemahčyma paźbiehnuć natoŭpu, naprykład na aŭtobusnym prypynku.
Pakul niama adnaznačnaha navukovaha adkazu, ci jość roźnica dla raspaŭsiudžvańnia kavidu, kali na vulicy ciopła abo chałodna. Amierykanskija navukoŭcy daśledavali karanavirusnuju infiekcyju ŭ roznych klimatyčnych umovach, adnak nie znajšli vyjaŭnaj suviazi z kolkaściu vypadkaŭ zachvorvańnia.
Kamientary