Vykładčykaŭ zvolnili, kali jany padpisali list suprać udziełu Hihina va UNS? Hihin: Adbyłasia pamyłka, treba trymacca razam
11 lutaha ŭ internecie źjaviŭsia adkryty zvarot da dekana fakulteta fiłasofii i sacyjalnych navuk Vadzima Hihina, u jakim asudžaŭsia jaho ŭdzieł va «Usiebiełaruskim narodnym schodzie». Pad zvarotam padpisałasia bolš za 200 čałaviek — vykładčykaŭ, studentaŭ, vypusknikoŭ FFSN.
Siarod tych, chto pastaviŭ svoj aŭtohraf, byli źniešnija sumiaščalniki Alaksiej Saśnicki i Jarasłava Kiča. Chto takija źniešnija sumiaščalniki? Jany pracujuć u inšych miescach, ale majuć kolki hadzin vykładańnia va ŭniviersitecie. Litaralna na nastupny dzień Saśnicki i Kiča paviedamili, što ź imi było vyrašana nie praciahvać supracoŭnictva.
«Ja padpisvaŭ zvarot, nie dumaŭ, što heta budzie mieć niejki infarmacyjny ŭpłyŭ. Ja pieryjadyčna niejkija štuki padpisvaju. Dalej byŭ u roli naziralnika, — dzielicca z «NN» Alaksiej Saśnicki. — Ja vykładaju svoj śpieckurs pra kreatyŭ, u mianie ŭsiaho adna para na tydzień. Na hetym tydni ŭ mianie pavinna była być pieršaja para, ale nibyta niejkija dakumientalnyja pytańni nie byli vyrašanyja. Ja patelefanavaŭ na kafiedru, kab udakładnić pa svaim zaniatku, bo jaho pieranieśli. Ale mnie skazali, što niama maich dakumientaŭ, jany nie dajšli, i sa mnoj budzie źviazvacca zahadčyk kafiedry.
Zahadčyk sapraŭdy pazvaniŭ i skazaŭ, što maja kandydatura nie prajšła niejki tam adbor, i ja bolš nie zmahu vykładać. Pryčynu mnie nie nazvali».
Toje samaje adbyłosia i ź Jarasłavaj Kičaj. Alaksiej i Jarasłava dzielać kurs pamiž saboj. Častka vyvučaje kretyŭny markietynh pad kiraŭnictvam Saśnickaha, a častka — internet-markietynh u Kičy.
«Siońnia ŭ druhoj pałovie dnia mnie pazvaniŭ namieśnik dekana, jaki skazaŭ, što adbyłasia pamyłka, i my možam znoŭ vykładać. Zvaniŭ dekan, zapytaŭsia, jakija jość pretenzii da jaho. Prapanavali jašče raz dasłać dakumienty, kab my mahli vykładać. My ź Jarasłavaj abmiarkoŭvali hety momant. Tam nie tyja hrošy, pra jakija možna maryć. Ale pazbaŭlać ceły kurs dvuch pradmietaŭ ad vykładčykaŭ-praktykaŭ — niapravilna. My pryniali rašeńnie praciahvać vykładańnie va ŭniviersitecie».
Dekan FFSN Vadzim Hihin tak patłumačyŭ historyju: «Situacyi niama, nie zanieśli druhuju zajavu ŭ adździeł kadraŭ. Ja ź imi parazmaŭlaŭ, my zrazumieli adno adnaho. Nu i ŭsio. Jany jašče navat nie pačynali čytać lekcyi, na hetym tydni pačaŭsia siemiestr. Jany byli źniešnija sumiaščalniki, ich dyściplina pačynajecca tolki z druhoha siemiestra.
U nas mohuć być roznyja pohlady, ale jak skazaŭ Saśnicki: «My — adna siamja». Tamu treba trymacca razam», — skazaŭ Hihin.
«U ciapierašni momant Alaksiej Saśnicki i Jarasłava Kiča nie źjaŭlajucca vykładčykami BDU. Da 30 červienia 2020 hoda jany byli źniešnimi sumiaščalnikami. Pry pastupleńni zajavy ab zaklučeńni ź imi pracoŭnych adnosin na druhi siemiestr biahučaha navučalnaha hoda hetaje pytańnie budzie razhledžana ŭ rabočym paradku», — paviedamili «NN» u pres-słužbie BDU.
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary