U sudzie Pieršamajskaha rajona zatrymany ŭładalnik kramy «Moj modny kut» Valeryj Jesipionak. Jon pryjšoŭ na sud nad žonkaj
U sudzie Pieršamajskaha rajona Minska siońnia zatrymany ŭładalnik kramy «Moj modny kut» Valeryj Jesipionak.
Jon pryjšoŭ na sud da svajoj žonki, paviedamlajuć pravaabaroncy.
Alena Jesipionak była zatrymanaja 26 studzienia. Pierad hetym u kramu prychodziła pravierka z MNS. Supracoŭniki vypisali pradprymalnikam kuču parušeńniaŭ, jany pavinny byli začynicca dla ich likvidacyi.
«Siońnia [u aŭtorak] ja pajechaŭ davać pakazańni ŭ Adździeł pa baraćbie z ekanamičnymi złačynstvami, a mnie paviedamili, što žonku zatrymali prosta ŭ kramie. Ludzi, jakija byli ŭ handlovym centry, raskazali, što Alena pytałasia ŭ tych, chto jaje zatrymlivaŭ: «Za što vy mianie zabirajecie?» Adkazali, što nibyta za prodaž niezarehistravanaj simvoliki. Pry hetym u nas kanfiskavali rečy z Pahoniaj. Jaje pavieźli ŭ Savieckaje RUUS», — raskazvaŭ 26 studzienia «NN» uładalnik kramy.
Alenu pačali sudzić 27 studzienia, ale za adzinočny pikiet pavodle č.1 art. 23. 34, jaki jana nibyta pravodziła 26 studzienia na praśpiekcie Niezaležnaści, 58. Pa hetym adrasie raźmiaščajecca HC «Maskoŭska-Vienski», dzie i pracuje krama «Moj modny kut».
Śviedka — milicyjant Hromaŭ śćviardžaŭ, što Alena pikietavała 20-30 chvilin. Sudździa Alaksandr Voŭk abviaściŭ pierapynak, kab atrymać videa, jakoje dakaža, što ŭ hety čas jana znachodziłasia ŭ kramie.
Paśla pierapynku, 28 studzienia, na praces pryjšoŭ uładalnik kramy — Valeryj Jesipionak, jaho zatrymali da pačatku pasiadžeńnia. Jamu skazali, što ŭ dačynieńni da jaho pravodzicca pravierka. Jesipionak paśpieŭ pieradać advakatu Aleny videa, jakoje dakazvaje jaje nievinavataść.
Sudździa Voŭk adpraviŭ spravu Aleny na dapracoŭku. Ale nieviadoma, ci vyzvalać jaje.
Kamientary