Mamu Siarhieja «Chłopotnoje dielcie» Mironava druhi raz za miesiac adpravili na sutki. Ciapier — za ściah u aknie

14 śniežnia u sudzie Maskoŭskaha rajona asudzili 60-hadovuju Śviatłanu Čapurka. Sudździa Siarhiej Kacar daŭ žančynie 12 sutak.

Śviatłana — mama kultavaha Siarhieja Mironava, viadomaha praz svoj manałoh pra «chłopotnoje dielcie».

Pavialičyć

«Ściah visieŭ u vaknie ŭ adnym z pakojaŭ. U subotu, 12 śniežnia, mama vyjšła hulać z sabakam. Ja tak razumieju, milicyja stajała za dźviaryma, — bo jaje adrazu zatrymali, — raskazaŭ «Našaj Nivie» Siarhiej. — Mama viarnułasia, kab sabaku pakinuć doma. Paśla jaje zabrali. Ja tak razumieju, zatrymali jaje za ściah. Bo mama, kali pryvodziła sabaku, skazała pra milicyju: «Naša štorka ŭ aknie im nie spadabałasia».

Niedzie praz hadzinu pryjšli jašče niejkija milicyjanty, pazvanili ŭ damafon, ja reflektorna adamknuŭ dźviery padjezda. Jany łamilisia ŭ kvateru, zvanili, hrukali, ja nie adkryvaŭ — syšli. Paśla ja na ŭsiaki vypadak źniaŭ ściah.

Zatym ja šukaŭ mamu ŭ RAUSie, tam adkazali, što niama zatrymanych u ich. Nu i paźniej znajšoŭ mamu na Akreścina.

Sud byŭ učora. Mama padała chadajnictva — zaprasić mianie ŭ jakaści jaje abaroncy. Ale ci to jany zvanili i nie dazvanilisia, ci to što — dakładna nie viedaju — karaciej, sa mnoju nie źviazvalisia ci nie mahli źviazacca i sud nie stali pieranosić, adrazu dali mamie 12 sutak».

Jon kaža, što heta ŭžo druhi termin dla mamy. Tydzień tamu Śviatłana vyjšła na volu paśla 15 sutak administracyjnaha aryštu.

«Mama zaŭsiody była aktyŭnaja. Na Maršy chodzić, pierad vybarami ŭlotki rasklejvała. U jaje ŭžo byŭ pratakoł za Žanočy marš — ale jaje nie paśpieli asudzić, bo prajšło dva miesiacy. A paśla zatrymali paśla Maršu 22 listapada, schapili, kali ŭžo išła dadomu. Paśla sudzili, dali 15 sutak.

U minuły paniadziełak jana vyjšła na volu. I ŭ subotu jaje znoŭ zabrali, — kaža Siarhiej. —

Pryčym paśla pieršych sutak mama viarnułasia z «karonaj». Jana siadzieła z chvoraj na karanavirus žančynaj, a paśla vychadu ŭ mamy źnik niuch. Jana pieranosiła biez tempieratury, ale była słabaść. Pajšła da doktara, ale tam na test nie adpraŭlali. Skazali: nijaki karancin nie patrebny, jak simptomy źniknuć, možacie hulać dzie zaŭhodna».

Ciapier Siarhiej budzie vyśviatlać, dzie jaho mamie daviadziecca adbyvać sutki, budzie źbirać pieradaču. Płanuje pieradać joj leki.

Sam Siarhiej, darečy, užo zvolniŭsia z «Intehrała». «Pakul siadžu prosta doma. Chacieŭ zaniacca pošukami pracy — ale voś prablemy navalilisia», — kaža jon.

«Bastovať — chłopotnoje dielcie». Što viadoma pra chłopca, jaki zatroliŭ milicyju ŭ kultavym videa i atrymaŭ 15 sutak

• 0
• 0
• 0
• 0
• 0
• 0
• 0
• 0