Pieratrus u maładziečanskaha jurysta i błohiera Rusłana Kisialova. Jaho zabrali ŭ SK u Minsk
Siońnia ranicaj adbyŭsia pieratrus u maładziečanskaha jurysta, błohiera i aktyvista Rusłana Kisialova. Paśla pieratrusu Kisialova zabrali śledčyja ŭ Minsk, piša Rehijanalnaja hazieta.
Pra toje, što ŭ Rusłana płanujuć pieratrus, jon paviedamiŭ u 9:30. U dvary šmatpaviarchovika pa Vialikim Haścincy stajaŭ ciomna-sini bus na numary AM 0315-3. Jamu pazvaniŭ staršy opierupaŭnavažany Dźmitryj Piatroŭski. Paviedamiŭ, što Hienieralnaja prakuratura sankcyjanavała pieratrus pa miescy žycharstva Kisialova.
«Davajcie ŭbačymsia, inakš my budziem łamać dźviery», — skazali jamu pa telefonie.
Kisialoŭ zadaŭ pytańnie, ci viadziecca niejkaja sprava ŭ adnosinach da jaho. Jamu adkazali: «Kryminalnaja sprava, jakaja rasśledujecca, zasakrečanaja».
Jamu taksama prysłali dva sms-paviedamleńni, mierkavana adpraŭlenyja z numara Minskaha upraŭleńnia ŭnutranych spraŭ.
Prykładna ŭ 10 hadzin pačaŭsia pieratrus, jon doŭžyŭsia kala hadziny. Pry hetym prysutničaŭ Rusłan i jaho maci Sofja. Kali ŭ kvateru zajšoŭ siabra Kisialova, adzin z prysutnych siłavikoŭ skazaŭ, što jon z Hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj.
Takim čynam, mierkavana na apieracyi byli zadziejničanyja dźvie hrupy: adna na busie z Hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj, druhaja na sierabrystym Folksvahienie z supracoŭnikami Śledčaha kamiteta.
Sofja Kisialova paviedamiła, što z kvatery zabrali noŭtbuk, telefon i elektronnyja nośbity infarmacyi. Taksama joj dali pračytać pastanovu, pavodle jakoj pravodzili pieratrus. Sofja Kisialova adznačyła, što tam fihuravała bolš za dziesiać kryminalnych artykułaŭ, jakija dakładna, žančyna nie zapomniła.
— Jak nam patłumačyli, heta z-za taho, što Rusłan vykłaŭ na jutubie zapis razmovy z pradstaŭnikom orhanaŭ unutranych spraŭ, — skazała Kisialova žurnalistam «Rehijanalnaj haziety».
Maci skazali, što Rusłana adviazuć u Centralny aparat Śledčaha kamiteta, jaki mieścicca ŭ Minsku. Kantakt dla suviazi pakinuli śledčaha śledčaj hrupy Hałoŭnaha śledčaha ŭpraŭleńnia Śledčaha kamiteta padpałkoŭnika justycyi Hančaryka. Taksama skazali, što, mahčyma, Rusłana siońnia adpuściać paśla razmovy.
Ciapier čytajuć
Ci varta kuplać zakinutuju chatu za adnu bazavuju i kolki heta kaštuje nasamreč? Voś što raskazvajuć ludzi1
Ci varta kuplać zakinutuju chatu za adnu bazavuju i kolki heta kaštuje nasamreč? Voś što raskazvajuć ludzi
Pašparty biełarusaŭ, jakija hałasujuć na vybarach u KR, apracuje kampanija, u jakoj apošniuju ŭciečku vyjavili ŭ 2026-m, a zasnavalniki — rasijanie7676
Kamientary