«Ukusiła za ściahno». Na ŭdzielnicu žanočaha maršu, jakuju žorstka zatrymali ŭ tralejbusie, zaviali kryminalnuju spravu
29 žniŭnia Natallu Rajentavu i jaje brata Alaksandra amapaŭcy žorstka zatrymali ŭ tralejbusie. Maładyja ludzi byli ŭdzielnikami subotniaha žanočaha maršu, za što ich pakarali administratyŭnym aryštam.
Jak paviedamlaje Tut.by, ciapier na Natallu zaviali i kryminalnuju spravu: pavodle prakuratury, žančyna nibyta ŭčyniła supraciŭ pry zatrymańni i ŭkusiła supracoŭnika milicyi za levaje ściahno. Natalla znachodzicca pad vartaj.
Zhodna z pratakołami ab administracyjnym pravaparušeńni, 29 žniŭnia Natalla i Alaksandr Rajentavy pryniali ŭdzieł u niesankcyjanavanym mitynhu: sabralisia ŭ zahadzia vyznačanym miescy i abmiarkoŭvali dziejnuju ŭładu i hramadska-palityčnaje žyćcio — u toj dzień u Minsku prachodziŭ žanočy marš. Kali ludziej pačaŭ adsiakać AMAP, Natalla i jaje brat zabiehli ŭ tralejbus. Prajechali prypynak, paśla čaho ŭ sałon zabiehli «ludzi ŭ čornym», jakija pačali ich vyciahvać.
«Ja spałochałasia tak, što abas******, ale mnie ŭžo było ŭsio roŭna, — patłumačyła Natalla ŭ sudzie. — Pačała chapacca za poručań, u mianie byŭ stan šoku. Potym skazali, što ja akazała niepadparadkavańnie. Kali b da mianie padyšli supracoŭniki ŭ formie, usio rastłumačyli — heta adno, a ludzi ŭ čornych maskach — inšaje, heta vielmi strašna».
Zhodna z rapartam kamandzira adździaleńniaŭ 4-j apieratyŭnaj roty AMAP Chomiča, bajcy ŭžyli siłu: za ruki i nohi vynieśli zatrymanych z tralejbusa i dastavili ŭ słužbovuju mašynu. Sud pryznačyŭ i bratu, i siastry pakarańnie ŭ vyhladzie administracyjnaha aryštu.
Zatrymańnie Rajentavych źniali na videa vidavočcy ŭ tralejbusie, vidać, jak pasažyry kryčać i prosiać milicyju vyjści: «Tut dzieci!», «Što vy robicie!»
Natalli 29 hadoŭ, pa śpiecyjalnaści jana inžynier-prahramist. U materyjałach administracyjnaj spravy, u tym liku pa fakcie niepadparadkavańnia supracoŭnikam milicyi, pra ŭkus ściahna nie zhadvałasia.
21 kastryčnika stała viadoma, što ŭ dačynieńni da Natalli zaviedzienaja kryminalnaja sprava pa art. 364 KK (Hvałt albo pahroza ŭžyvańnia hvałtu ŭ dačynieńni da supracoŭnika orhanaŭ unutranych spraŭ, karajecca aryštam ci abmiežavańniem voli na termin da piaci hadoŭ abo pazbaŭleńniem voli na termin da šaści hadoŭ).
Ciapier čytajuć
Byłoha milicyjaniera asudzili za žadańnie vajavać u Pałku Kalinoŭskaha. Pahražała da 15 hadoŭ kałonii11
Kamientary