Kali hramadzianskaja supolnaść Biełarusi nie budzie ŭklučana ŭ novuju palityku «Uschodniaje partniorstva», to hetaja prahrama faktyčna stanie lehitymacyjaj režymu Łukašenki, havorycca ŭ dakumiencie.
Kali hramadzianskaja supolnaść Biełarusi nie budzie ŭklučana ŭ novuju palityku «Uschodniaje partniorstva» Jeŭrasajuza, to hetaja prahrama faktyčna stanie lehitymacyjaj režymu Łukašenki.
Pra heta havorycca ŭ zajavie lideraŭ biełaruskaj apazicyi, jakaja była raspaŭsiudžana 7 maja ŭ Prazie na pres‑kanfierencyi ŭ češskim MZS.
Dakumient padpisali staršynia Rady BNR Ivonka Surviła, staršynia Biełaruskaj sacyjał‑demakratyčnaj Hramady Stanisłaŭ Šuškievič, lider Kansiervatyŭna‑Chryścijanskaj partyi — BNF Zianon Paźniak, palityk Alaksandr Kazulin.
Jašče adzin z zaprošanych u Prahu ŭ liku lideraŭ biełaruskaj apazicyi Alaksandr Milinkievič nie padpisaŭ zvarot. Jon miarkuje, što ŭdzieł Biełarusi ŭ prahramie «Uschodniaje partniorstva» treba ŭ kožnym razie vitać, nie abstaŭlajučy nijakimi ŭmovami, bo ŭdzieł, niezaležna ad Łukašenki, vyhadny Biełarusi i paspryjaje jaje jeŭrapiejskaj transfarmacyi.
«Ja padtrymlivaŭ ŭ asnoŭnym źmiest hetaj zajavy, — zajaviŭ Milinkievič u intervju radyjo «Svaboda», — ale takija zajavy pavinny być vielmi piśmiennymi i vyvieranymi. Tam jość śćviardžeńni, jakija nie majuć faktałohii. Naprykład, havaryłasia ab tym, što ŭ Rasiei i kiraŭnictva Biełarusi jość płan, jak razburyć «Uschodniaje partniorstva».
Rola «Trajanskaha kania» advodzicca Biełarusi. Ja nivodnaha takoha faktu nie viedaju, tamu prapanavaŭ hety punkt źniać. Takija mierkavańni nie ŭklučajucca ŭ surjoznyja zajavy. I prapanavaŭ svoj tekst, ale bolšaść była za toje, kab hety tekst pakinuć».
Na dumku padpisantaŭ dakumientu, «harantyja pravoŭ hramadzianskaj supolnaści i kožnaha čałavieka pavinna stać umovaj supracoŭnictva ź biełaruskimi ŭładami». Lidery apazicyi taksama źviarnuli ŭvahu na «antykulturny charaktar režymu ŭ Biełarusi». Na ich dumku, «kultura siońnia — adna z važniejšych umoŭ suvierenitetu krainy».
Biełaruskija palityki zaklikali da piaci rekamiendacyj Jeŭrasajuza dla narmalizacyi adnosinaŭ ź Biełaruśsiu dadać jašče adnu — «zabieśpiačeńnie svabodnaha raźvićcia biełaruskaj kultury, adukacyi i tvorčaści». Pradstaŭniki biełaruskaj apazicyi ličać, što siarod pryjarytetnych kirunkaŭ prahramy «Uschodniaje partniorstva» pavinny być «abarona biełaruskaj kultury ad sistematyčnaha źniščeńnia antybiełaruskim režymam».
U halinie ekanomiki demakratyčnyja lidery adznačyli takija važnyja śfiery, jak enierhietyku i pastaŭki enierhietyčnych resursaŭ. Jany taksama vykazalisia za ablahčeńnie vizavaha režymu dla hramadzian Biełarusi.
Lidery apazicyi zaklikali palitykaŭ ES źviarnuć uvahu na važnaść [nie dapuścić] farmiravańnia ahulnaj stratehii Łukašenki i jaho ŭschodnich sajuźnikaŭ u adnosinach da prahramy «Uschodniaje partniorstva».
Kamientary