Palitviaźni-2020. Historyja kiroŭcy aŭtadoma Alaksandra Aranoviča, jaki zastaŭsia biez hrošaj i dałučyŭsia da «Krainy dla žyćcia»
Alaksandr Aranovič byŭ kiroŭcam aŭtadoma «Krainy dla žyćcia». Zvyčajny rabaciaha z rajcentra, jaki naŭrad ci źviazaŭsia b z palitykaj, kali b było za što karmić siamju. Dałučycca da Siarhieja Cichanoŭskaha jon vyrašyŭ paśla taho, jak jaho na hrošy kinuŭ kałhas.
Ros biez baćki, zajmaŭsia hruzapieravozkami
37-hadovy Alaksandr sa Starych Daroh. Maci raściła jaho adna.
«Žyli biedna, u maleńkim domie. Hryby zdavali, Saša dapamahaŭ maci. Jana kaliści ŭ adździele kultury pracavała, na dyskatekach na ŭvachodzie dziažuryła, dyk Saša jaje časam padmianiaŭ. Małodšaha brata niańčyŭ», — raskazvaje Siarhiej Klimovič, jaki viedaje Aranoviča ź dziacinstva.
U škole Alaksandr zajmaŭsia baraćboj. Paśla pastupiŭ u Babrujskaje vučylišča alimpijskaha reziervu. Ale ŭ sport dalej nie pajšoŭ — treba było zarablać, kab za štości žyć.
Mužčyna pracavaŭ na budoŭlach, a paśla zaniaŭsia hruzapieravozkami. Na niejki čas uładkavaŭsia kiroŭcam da maci z ajčymam — u tych było IP, jakoje narychtoŭvała hryby i jahady.
«Z technikaj jon siabravaŭ. Kupiŭ staruju hruzavuju mašynu, sam pierarabiŭ jaje. Paśla abmianiaŭ na bolšaje aŭto, kali vajskovyja častki raspradavali techniku. Jon rabaciaha», — raskazvaje pra pryjaciela Siarhiej.
Apošnim časam Alaksandr pracavaŭ jak ipešnik na kałhas — vaziŭ karmy, bulbu. Ale ŭ haspadarcy pačalisia prablemu — jany byli vinny mužčynie vialikuju sumu. Prapanoŭvali raźlik pa bartaru — ale kamu patrebna mašyna burakoŭ? Tamu Alaksandr nie staŭ ź imi dalej źviazvacca.
U siužecie «Biełaruś 1» raskazvali, što ŭ jaho była sudzimaść, pa jakoj jon adbyvaŭ pakarańnie ŭ žodzinskaj kałonii. Termin mužčyna atrymaŭ za bojku. «Heta daŭno było. Dyj vy ž viedajecie, jakoje ŭ nas pravasudździe. Saša źniešnie hramiła, ale ŭnutry dobry čałaviek. U jaho šmat siabroŭ, jon nikoli nie padvodziŭ. Kali treba — dapamoža, nie bałaboł», — adhukajucca siabry.
Dvoje dziaciej, žonka pracuje u vykankamie
U Starych Darohach Aranoviča čakaje siamja — žonka i dvoje dziaciej. Žonka Viktoryja pracuje ŭ adziele ekanomiki rajvykankama.
«Z pracy nie zvolnili pakul», — uśmichajecca jana.
Da kamandy Cichanoŭskaha Aranovič dałučyŭsia letaś, paklikaŭ chtości sa znajomych.
«Raniej jon palitykaj nie cikaviŭsia. Ale, kaniečnie, byli prablemy, ad dobraha žyćcia na takija kroki nie pojdzieš. Ja była suprać jaho ŭdziełu ŭ hetych mierapryjemstvach, pakolki zrazumieła było, čym usio skončycca», — dzielicca Viktoryja.
«Dy ciapier usie palityku abmiarkoŭvajuć, — zaŭvažaje pryjaciel Siarhiej. — Voś słuchajem pa telebačańni, što ŭsie atrymlivajuć pa $500 dalaraŭ. U Starych Darohach $150 zarobak. Ja pracuju ŭ Rasii 22 hady, tam taksama słuchajuć telebačańnie. «U vas taki dobry prezident, navošta vam siudy jeździć?» — ździŭlajucca».
Kanfiskavali hrošy, jakija maci źbirała na vučobu małodšamu synu
Pieršy raz Aranoviča zatrymali 6 maja, na nastupny dzień paśla sustrečy ź ludźmi ŭ Mahilovie. Razam ź im tady schapili Arcioma Sakava i Uładzimira Niaronskaha, jakija taksama ŭ kamandzie «Krainy dla žyćcia». Za «arhanizacyju niesankcyjanavanaha mitynhu z publičnym asudžeńniem ułady» Alaksandr atrymaŭ šeść sutak.
Druhi raz jaho zatrymali 29 maja padčas pikietu pa zbory podpisaŭ u Hrodnie. Jak i inšych «cichanoŭcaŭ», mužčynu abvinačvajuć u arhanizacyi hrupavych dziejańniaŭ, jakija hruba parušajuć hramadski paradak (art. 342 Kryminalnaha kodeksa).
Pra toje, što Sašu zabrała milicyja, svajaki daviedałasia praź internet. Doma ŭ siamji dvojčy prachodzili vobšuki. Jak raskazvała «Viaśnie» maci Aranoviča, pracavali śledčyja ź Minsku, paniatymi pieršy raz pryviali nie miascovych. U vyniku kanfiskavali sistemny błok kampjutara i hrošy.
«Heta byŭ naš siamiejny zapas. U mianie inšy syn jašče vučycca na płatnym adździaleńni, tamu ja ciapier vymušanaja pazyčać hrošy ŭ znajomych», — dzialiłasia maci.
Alaksandra trymajuć u SIZA na vulicy Vaładarskaha ŭ Minsku. Apošni sud pa im byŭ 2 lipienia — za ŭdzieł u pikiecie 29 maja mužčynu nakinuli 10 sutak.
Čytajcie taksama
Palitviaźni-2020. Chto taki apieratar Viarhilij Ušak, jaki staŭ vypadkovaj achviaraj pravakacyi ŭ Hrodnie?
Palitviaźni-2020. Jak były pahraničnik Arciom Sakaŭ staŭ apierataram u kamandzie Cichanoŭskaha
Ciapier čytajuć
Chrysta Hrozieŭ: ad ramantyka-radyjoamatara da čałavieka, jaki vykryŭ samyja zmročnyja tajamnicy HRU i FSB. Jak jaho vierbavała śpiecsłužba Luksiemburha i jak jon vymušany chavacca ciapier
Kamientary