Na mitynh Cichanoŭskaj u Hłybokim sabrałasia bolš za 1000 čałaviek. Takoha ŭ historyi horada jašče nie było FOTY, VIDEA
Na sustreču sa Śviatłanaj Cichanoŭskaj u Hłybokim sabrałasia bolš za 1000 čałaviek. Mitynh z kandydatkaj prachodzić na stajancy pierad «Biełmarkietam».
Nasielnictva Hłybokaha — 17800 čałaviek.
Na pamiaci hłybačan takich masavych mitynhaŭ u horadzie nie było. Acanicie pa videa:
Vałanciory razdajuć usim achvotnym biełyja stužki, tłumačać, jak stać naziralnikam na vybarach. Źviartaje na siabie ŭvahu, što šmat dla kaho mitynh nie šarahovaja padzieja ŭ žyćci — šmat žančyn, apranutych śviatočna.
Pakul žychary Hłybokaha čakajuć vystupoŭcaŭ, dla ich uklučyli vyklučna biełaruskija pieśni. Šmat ludziej ź bieł-čyrvona-biełymi ściahami, tyja, u kaho ich niama, prosiać ź imi sfatahrafavacca.
Čytajcie taksama: «Śvieta, Śvieta», — tysiačy barysaŭcaŭ kranalna sustreli Cichanoŭskuju FOTY
Chto-nichto pryjšoŭ z samarobnymi płakatami.
Kamanda Śviatłany Cichanoŭskaj na miescy była ŭ 13.40. Pačała svoj vystup Śviatłana słovami, što joj vielmi baluča stajać na scenie adnoj, bo jaje muž u turmie, paśla raspaviała pra siabie i historyju svajho muža. «My abjadnalisia, kab try nievialikija raki źlilisia ŭ adnu raku narodnaha (Śviatłana nie moža padabrać patrebnaje słova, ź pieršych šerahaŭ padkazvajuć: «Hnievu!») hnievu», — tłumačyć rašeńnie abjadnacca sa štabam Babaryki i Capkały.
Ludziej sabrałasia stolki, što ŭsim achvotnym nie chapaje miesca na vyłučanaj placoŭcy, ludzi vymušanyja stajać na supraćlehłym baku darohi.
«Višniovy fiestyval u Hłybokim skaracili da adnaho dnia, bo ŭ krainie karanavirus, a jak pravodzić «Słavianski bazar» niekalki dzion — karanavirusa niama», — zaŭvažyła Cichanoŭskaja.
Viadučy prosić nie kryčać kryčałak, źviazanych z nasiakomymi, bo «my nie chočam, kab byŭ chapun, kab kahości zatrymali, prynamsi da 9 žniŭnia».
Na scenu paśla vystupu tryumviratu da volnaha mikrafona padniałasia žančyna, jaje słovy ŭspryniali jak pravakacyju i sustreli śvistam, jana sa sceny syšła. Karespandentu NN žančyna skazała, što chacieła padzialicca, što jaje vielmi raduje, što piensii svoječasova płaciać.
Na raźvitańnie ŭsie prysutnyja tradycyjna praśpiavali pieśniu «Mury», napieradzie ŭ kamandy siońnia Navapołack (16.30, uvachod u haradski park kultury i adpačynku) i Viciebsk (19.00, Park kultury i adpačynku čyhunačnikaŭ, u rajonie centralnaj sceničnaj placoŭki).
«U pašparcie babuli staić data naradžeńnia 00.00.1945» — «A ŭ majoj XX.XX.1940». Jak takoje moža być?2
Kamientary