На мітынг Ціханоўскай у Глыбокім сабралася больш за 1000 чалавек. Такога ў гісторыі горада яшчэ не было ФОТЫ, ВІДЭА
На сустрэчу са Святланай Ціханоўскай у Глыбокім сабралася больш за 1000 чалавек. Мітынг з кандыдаткай праходзіць на стаянцы перад «Белмаркетам».
Насельніцтва Глыбокага — 17800 чалавек.
На памяці глыбачан такіх масавых мітынгаў у горадзе не было. Ацаніце па відэа:
Валанцёры раздаюць усім ахвотным белыя стужкі, тлумачаць, як стаць назіральнікам на выбарах. Звяртае на сябе ўвагу, што шмат для каго мітынг не шараговая падзея ў жыцці — шмат жанчын, апранутых святочна.
Пакуль жыхары Глыбокага чакаюць выступоўцаў, для іх уключылі выключна беларускія песні. Шмат людзей з бел-чырвона-белымі сцягамі, тыя, у каго іх няма, просяць з імі сфатаграфавацца.
Чытайце таксама: «Света, Света», — тысячы барысаўцаў кранальна сустрэлі Ціханоўскую ФОТЫ
Хто-ніхто прыйшоў з самаробнымі плакатамі.
Каманда Святланы Ціханоўскай на месцы была ў 13.40. Пачала свой выступ Святлана словамі, што ёй вельмі балюча стаяць на сцэне адной, бо яе муж у турме, пасля распавяла пра сябе і гісторыю свайго мужа. «Мы аб'ядналіся, каб тры невялікія ракі зліліся ў адну раку народнага (Святлана не можа падабраць патрэбнае слова, з першых шэрагаў падказваюць: «Гневу!») гневу», — тлумачыць рашэнне аб'яднацца са штабам Бабарыкі і Цапкалы.
Людзей сабралася столькі, што ўсім ахвотным не хапае месца на вылучанай пляцоўцы, людзі вымушаныя стаяць на супрацьлеглым баку дарогі.
«Вішнёвы фестываль у Глыбокім скарацілі да аднаго дня, бо ў краіне каранавірус, а як праводзіць «Славянскі базар» некалькі дзён — каранавіруса няма», — заўважыла Ціханоўская.
Вядучы просіць не крычаць крычалак, звязаных з насякомымі, бо «мы не хочам, каб быў хапун, каб кагосьці затрымалі, прынамсі да 9 жніўня».
На сцэну пасля выступу трыумвірату да вольнага мікрафона паднялася жанчына, яе словы ўспрынялі як правакацыю і сустрэлі свістам, яна са сцэны сышла. Карэспандэнту НН жанчына сказала, што хацела падзяліцца, што яе вельмі радуе, што пенсіі своечасова плацяць.
На развітанне ўсе прысутныя традыцыйна праспявалі песню «Муры», наперадзе ў каманды сёння Наваполацк (16.30, уваход у гарадскі парк культуры і адпачынку) і Віцебск (19.00, Парк культуры і адпачынку чыгуначнікаў, у раёне цэнтральнай сцэнічнай пляцоўкі).
Перасцярогі перад «новымі Жыткавічамі». Кіеў дарма бачыць пагрозу ў будаўніцтве мастоў цераз Прыпяць і Мухавец31
Каментары